Песков сафарбарликнинг янги тўлқини ҳақидаги тахминларни «провокация» деб атади

Россия президенти Владимир Путин москвалик депутатлар илтимосига қарамай, сафарбарликнинг якунланиши ҳақида фармон имзоламоқчи эмас. Бу ҳақда унинг матбуот котиби Дмитрий Песков кундалик брифингда маълум қилди.

«Биз бу борада ҳамма нарсани тушунтириб берганмиз, шунинг учун ҳеч қандай новациялар йўқ», — деди Песков Москва шаҳар думаси депутатларининг тегишли фармон чиқариш ҳақида Путинга юборилган мурожаатини изоҳлар экан.

Шунингдек, Песков сафарбарликнинг иккинчи тўлқини бошланиши мумкинлиги ҳақидаги хабарларга эътибор қаратмасликка чақириб, «мудофаа вазирлиги ва президентдан келиб тушаётган ахборотга урғу бериш»ни таклиф қилди. У бундай хабарларни «провокацион» деб атади.

2022 йил сентябрида, Россияда сафарбарлик бошланишидан тахминан бир ой аввал, Дмитрий Песков бундай бўлмаслигига ишонтирганди. «Ҳозирги пайтда йўқ, бу ҳақда ҳеч қандай гап йўқ», — деган эди у.

Москва шаҳар думасининг КPRФ, «Яблоко» ва «Адолатли Россия» партияларидан депутатлари ноябрь охирида Путиндан сафарбарликни якунлаш ҳақида фармон чиқаришни сўраган, буни жорий вазиятда Россиянинг кўпчилик фуқаролари «ўзининг ва ўз оиласининг келажагини режалаштира олмаётгани ҳамда одатий ҳаёт тарзини олиб бора олмаётгани» билан изоҳлаган эди.

Кремлда сафарбарликни якунлаш ҳақида алоҳида фармон талаб этилмаслиги таъкидлаб, Путиннинг бунга «нуқта қўйилгани» ҳақидаги гапларига ишонишга чақиришмоқда. Мустақил ҳуқуқшунослар қайд этишича, президентнинг оғзаки баёноти етарли эмас.

Путин ва Мудофаа вазирлигининг сафарбарлик «якунлангани» ҳақидаги баёнотларидан кейин, Россиянинг турли ҳудудларида аҳоли урушга олиб кетилаётгани ҳақида хабарлар пайдо бўлишда давом этмоқда.