BBC нашри йилнинг энг нуфузли 100 нафар аёлидан иборат рўйхат эълон қилди. Унга уч нафар россиялик кирди, булар — қўшиқчи Алла Пугачёва, рассом Саша Скочиленко ва «Холод» нашри бош муҳаррири Таисия Бекбулатова.
Рассом Саша Скочиленко апрелда Россия қуролли кучларининг Украинадаги ҳаракатлари ҳақида «ёлғон маълумот тарқатишда айбланиб қўлга олинганди, у дўконда маҳсулотларга нархкўрсаткичлар ўрнига урушга қарши варақалар жойлаштириб чиққан. У 10 йилгача муддатга озодликдан маҳрум этилиши мумкин. Amnesty International ташкилоти Скочиленкони виждон асираси деб тан олган.
Таисия Бекбулатова эса Meduza нашрининг собиқ махсус мухбиридир.
BBC рўйхатига, шунингдек, Украинанинг саккиз нафар вакили кирди, улар орасида мамлакат биринчи хоними Елена Зеленская, Россияда асирликда бўлиб қайтган парамедик Юлия Паевская ва нуфузли Филдс мукофотини қўлга киритган математик Марина Вязовская бор.
Бундан ташқари, рўйхатдан Еврокомиссия раҳбари Урсула фон дер Ляйен, қўшиқчи Билли Айлиш, актриса Приянка Чопра-Жонас ва ўз сочларини қирқиб ташлаётган аёл ўрин олди — у Эронда ҳижобни «нотўғри» ўраган қизнинг ўлимидан кейин бошланган норозилик намойишлари иштирокчиларининг умумий тимсолидир.
«Биз исмлари сўнгги 12 ой ичида янгиликлар сарлавҳаларида чиққан ёки муҳим воқеаларга ўз таъсирини ўтказган, шунингдек, янгиликларда тилга олинмаса-да, бошқалар учун руҳлантирувчи ҳикоя бўла оладиган ёки аҳамиятли ютуққа эришиб, ўз жамиятига қандайдир таъсир ўтказа олган номзодларни қидирдик», — дея BBC рўйхат қаҳрамонлари қандай танлаб олинганини тушунтириб берди.
Мавзуга доир:
Изоҳ (0)