5 декабрь куни Россиянинг Саратов ва Рязань вилоятларида аэродромларга ҳужум қилган дронлар Украина ҳудудидан учирилган. Бу ҳақда The New York Times украиналик юқори мансабли амалдорга таяниб хабар берди.
Ҳужумлардан камида биттасини Украина махсус топшириқли бўлинмалари гуруҳи мувофиқлаштирган, улар Россия базаси яқинида туриб, учувчисиз учар қурилмалар нишонга бориб тегишида ёрдам берган. Шу билан бирга, улар Россия ҳудудига қандай киргани тушунарсиз, деб ёзади газета.
Аэродромлардаги ҳодисалар шундан гувоҳлик берадики, Киев фронтдан анча ичкарида жойлашган Россия ҳарбий базаларига ҳужум қилишга тайёр, дейилади хабарда. Бундан ташқари, таъкидланишича, бу ҳужумлар Украинанинг катта масофаларга зарбалар бериш қобилиятини кўрсатади.
Газета бу операцияни Украина армияси учун уруш бошидан буён «энг дадили» деб атади. Ўз навбатида, Британия разведкаси кунлик маълумотномасида ёзишича, ҳодисани Россиянинг ўз ҳарбий объектлари қўриқланишини ташкил қилишдаги стратегик жиҳатдан энг муҳим муваффақиятсизликларидан бири деб ҳисоблаш мумкин.
5 декабрь куни эрталаб ОАВлар Саратов вилоятидаги Энгельс шаҳри яқинида жойлашган аэродромга учувчисиз учар қурилма келиб қулагани ҳақида хабар берди. Оқибатда икки ҳарбий хизматчи яраланган, иккита Ту-95 бомбардимончи-ракета ташувчи самолёт зарар кўрган. Бу билан деярли бир вақтда Рязань яқинидаги аэродромда бензовоз (бензин ташувчи цистернали автомобиль) портлаб кетгани маълум бўлди, натижада, ОАВларга кўра, самолётлардан бирига зарар етган. «ТАСС» манбалари уч киши ҳалок бўлиб, беш киши жабрланганини маълум қилди.
Шу куниёқ Россия қўшинлари Украина ҳудудида муҳим инфратузилма объектларини ёппасига ракеталар билан ўққа тутди, кечқурун эса Россия Мудофаа вазирлиги аэродромларга Украина ҳужум қилганини тасдиқлади. Украина шу тариқа узоқ масофали Россия самолётларини издан чиқаришга уринган, деди муассаса.
Вазирлик версиясига кўра, Украина дронлари Россия ҳаво ҳужумига қарши мудофаа тизими кучлари томонидан тутиб қолинган. Қурилмалар ерга қулаши ва портлаши натижасида иккита самолётга «кичик» зарар етган. Идора Россия ҳарбий хизматчилари орасида уч киши ҳалок бўлиб, тўрт киши яраланганини тасдиқлади.
Киев ҳужумлар учун жавобгарликни расман ўз зиммасига олганича йўқ. Россия аэродромларидаги портлашлар ҳақидаги хабарлардан кейин Украина президенти офиси раҳбари маслаҳатчиси Михаил Подоляк бошқа мамлакатларнинг ҳаво ҳудудларига «номаълум учар жисмлар» учириш оқибатлари ҳақида твит ёзди.
Изоҳ (0)