АҚШ Яқин Шарқдан бир нечта ҳаво ҳужумига қарши мудофаа тизимларини Украинага олиб ўтмоқчи. Бу ҳақда NASAMS зенит ракета мажмуаларини ишлаб чиқарувчи Raytheon Technologies компанияси раҳбари Грег Хеес Politico нашрига берган интервьюсида маълум қилди.
«Яқин Шарққа NASAMS тизимлари жойлаштирилган, биз НАТО бўйича баъзи иттифоқдошларимиз билан бирга Яқин Шарқда айни пайтда NASAMS’дан фойдаланаётган айрим мамлакатлар билан иш олиб боряпмиз ва уларни Украинага йўналтиришга ҳаракат қиляпмиз», — деди Хеес.
АҚШ ушбу зенит ракета мажмуаларини Украинага уч-олти ой ичида юбориб, сўнг икки йил мобайнида Яқин Шарққа бу тизимлар ўрнига бошқасини етказмоқчи, дея аниқлик киритди у.
Raytheon раҳбари қайд этишича, NASAMS’ни Яқин Шарқдан Украинага кўчириш уни АҚШда ишлаб чиқаргандан кўра тезроқ бўлади, чунки бунга икки йил вақт керак бўлади.
Компания NASAMS қайси Яқин Шарқ мамлакатидан кўчириб ўтказилишига аниқлик киритмади. Хавфсизлик соҳасидаги ҳамкорлик бўйича агентлик (DSCА) маълумотларига кўра, минтақада ушбу тизим харидорлари Уммон ва Қатар ҳисобланади.
Уммон Raytheon билан NASAMS етказиб бериш ҳақида 2014 йилда шартнома тузган. 2019 йилда АҚШ зенит ракета мажмуасини Қатарга сотишга рози бўлган.
Аввалроқ АҚШ Украина учун NASAMS ҳаво ҳужумига қарши мудофаа тизимини сотиб олиш бўйича Raytheon компанияси билан 1,2 миллиард долларлик шартнома тузган эди.
23 ноябрь куни АҚШ президенти Жо Байден давлат котиби Энтони Блинкенга Украинага 400 миллион доллар ҳарбий кўмак ажратишни таъминлашни топширди. Мамлакат Мудофаа вазирлиги аниқлик критиишича, янги ёрдам пакетига, шу жумладан, NASAMS ракета тизимлари учун қўшимча ўқ-дорилар киради. 4 ноябрь куни Пентагон Украинага саккизта NASAMS мажмуаларини юборганини маълум қилганди.
Аввалроқ АҚШ мудофаа вазири Ллойд Остин АҚШ Украинага 20 миллиард доллардан ортиқ ҳарбий ёрдам кўрсатгани ва қанча вақт керак бўлса, шунча вақт Киевни қўллаб-қувватлашда давом этишини айтганди.
Изоҳ (0)