AQSH Yaqin Sharqdan bir nechta havo hujumiga qarshi mudofaa tizimlarini Ukrainaga olib o‘tmoqchi. Bu haqda NASAMS zenit raketa majmualarini ishlab chiqaruvchi Raytheon Technologies kompaniyasi rahbari Greg Xeyes Politico nashriga bergan intervyusida ma’lum qildi.
“Yaqin Sharqqa NASAMS tizimlari joylashtirilgan, biz NATO bo‘yicha ba’zi ittifoqdoshlarimiz bilan birga Yaqin Sharqda ayni paytda NASAMS’dan foydalanayotgan ayrim mamlakatlar bilan ish olib boryapmiz va ularni Ukrainaga yo‘naltirishga harakat qilyapmiz”, — dedi Xeyes.
AQSH ushbu zenit raketa majmualarini Ukrainaga uch-olti oy ichida yuborib, so‘ng ikki yil mobaynida Yaqin Sharqqa bu tizimlar o‘rniga boshqasini yetkazmoqchi, deya aniqlik kiritdi u.
Raytheon rahbari qayd etishicha, NASAMS’ni Yaqin Sharqdan Ukrainaga ko‘chirish uni AQSHda ishlab chiqargandan ko‘ra tezroq bo‘ladi, chunki bunga ikki yil vaqt kerak bo‘ladi.
Kompaniya NASAMS qaysi Yaqin Sharq mamlakatidan ko‘chirib o‘tkazilishiga aniqlik kiritmadi. Xavfsizlik sohasidagi hamkorlik bo‘yicha agentlik (DSCA) ma’lumotlariga ko‘ra, mintaqada ushbu tizim xaridorlari Ummon va Qatar hisoblanadi.
Ummon Raytheon bilan NASAMS yetkazib berish haqida 2014-yilda shartnoma tuzgan. 2019-yilda AQSH zenit raketa majmuasini Qatarga sotishga rozi bo‘lgan.
Avvalroq AQSH Ukraina uchun NASAMS havo hujumiga qarshi mudofaa tizimini sotib olish bo‘yicha Raytheon kompaniyasi bilan 1,2 milliard dollarlik shartnoma tuzgan edi.
23-noyabr kuni AQSH prezidenti Jo Bayden davlat kotibi Entoni Blinkenga Ukrainaga 400 million dollar harbiy ko‘mak ajratishni ta’minlashni topshirdi. Mamlakat Mudofaa vazirligi aniqlik kritiishicha, yangi yordam paketiga, shu jumladan, NASAMS raketa tizimlari uchun qo‘shimcha o‘q-dorilar kiradi. 4-noyabr kuni Pentagon Ukrainaga sakkizta NASAMS majmualarini yuborganini ma’lum qilgandi.
Avvalroq AQSH mudofaa vaziri Lloyd Ostin AQSH Ukrainaga 20 milliard dollardan ortiq harbiy yordam ko‘rsatgani va qancha vaqt kerak bo‘lsa, shuncha vaqt Kiyevni qo‘llab-quvvatlashda davom etishini aytgandi.
Izoh (0)