Катта адрон коллайдери энергияни тежаш учун муддатидан аввал тўхтатиб қўйилди

Европа ядро тгадқиқотлари маркази (CERN) 28 ноябрь куни Катта адрон коллайдерини муддатидан аввал режали тўхтатди, деб ёзади «Коммерсантъ».

«Шу йил қишда кутиладиган энергия инқирози»га жавобан, CERN дирекцияси ҳар йилги анъанавий техник тўхташ бошланишини икки ҳафта олдинга суришга қарор қилгани ҳақида сентябрдаёқ маълум бўлганди.

2022 йил бошида тақдим этилган Катта адрон коллайдерига хизмат кўрсатиш графиги бўйича дастлаб CERN режали тўхташни декабрга белгилаган. Коллайдерни тўхтатиш ҳақида электр энергияси етказиб берувчиси — Франциянинг Electricите де France компанияси билан келишилган.

Шунингдек, CERN 2023 йилда мажмуадан фойдаланиш 20 фоизга қисқартирилишини маълум қилганди. Марказдагилар айтишича, бу чора, Катта адрон коллайдерининг тўхтатилиши каби, энергия истеъмолини сезиларли даражада камайтириш имконини беради.

Аввалроқ CERN энергия тармоғига юкламалар авжига чиққан пайтда зарраларни тезлатувчиларнинг баъзиларини ўчириб қўйиш бўйича режани ишлаб чиқаётгани хабар берилганди. CERN, шунингдек, зарурият юзага келса, Катта адрон коллайдерининг ишини тўхтатиш имкониятини ҳам кўриб чиқаётганди. 4,4 миллиард долларлик дунёдаги энг катта зарраларни тезлатувчи — Катта адрон коллайдери CERN’нинг саккизта тезлатувчиларидан биридир.

Франция-Швейцария чегарасида жойлашган CERN — Франциядаги энг йирик электр энергияси истеъмолчиларидан бири. Авж нуқтада марказ қарийб 200 МВт истеъмол қилади, бу энг яқиндаги шаҳар — Швейцариянинг Женевасидагидан уч марта кўпроқ демакдир.

Катта адрон коллайдери — дунёдаги энг кучли зарра тезлатувчи. Коллайдер зарраларни ёруғлик тезлигига яқин кўрсаткичларгача тезлатади ва улар бир-бири билан тўқнашади. Унинг ёрдамида олимлар 2012 йилда Хиггс бозонини аниқлаган. 2018 йил декабрида коллайдер таъмирлаш учун тўхтатиб қўйилганди. Шу йилнинг июлида у қайтадан ишга туширилди.