Украина Ғарб ёрдамисиз бир неча ҳафта ичида блекаутда қолиши мумкин, деди Австрия Мудофаа вазирлиги ҳарбий стратеги, полковник Маркус Райснер ZDF нашрига берган интервьюсида.
«Агар кучли ҳаво мудофааси ўрнатилмаса, Украина бир неча ҳафта ичида бутунлай зулматда қолади», — деди Райснер.
Унинг сўзларига кўра, Киев инфратузилмага қилинадиган ҳужумларга дош беролмайди, чунки дастлабки босқичда Россия ҳарбийлари Украина ҳаво ҳужумидан мудофаа тизимининг учдан бир қисмини йўқ қилган.
«Ғарб эса айни пайтда Москванинг имкониятларини етарлича баҳоламади», — дея қўшимча қилди вазирлик расмийси.
Полковникнинг таъкидлашича, Украина майдонининг катталиги ва ҳимоя қилиниши керак бўлган объектларнинг кўплиги туфайли «бу борада бирор нима қилиш» деярли имконсиз.
«Европа ўзида борини йиғиб, Украинага жўнатмоқда. Биз ортда қоляпмиз, Россия эса яна ташаббусни қўлига олмоқда. Бу парадоксал ҳолат», — таъкидлади Райснер.
Россия Қуролли кучлари 10 октябрдан буён Украина инфратузилмасига йирик зарбалар бермоқда.
Украина ҳукумати маълумотларига кўра, 15 ноябрь куни Россия мамлакат энергетика тизимига уруш бошидан буён энг кучли зарбани берган. Ўққа тутишлар фонида Украинада электр энергияси вақти-вақти билан ўчириб қўйилмоқда.
Бундай ҳужумларнинг сўнггиси 23 ноябрда содир бўлди. Зеленскийнинг айтишича, Россия 67 та ракета учирган, оқибатда Киев, Одесса ва Чернигов вилоятлари электрдан узилиб қолган.
Россия президенти матбуот котиби Дмитрий Песков Украинанинг кўплаб ҳудудларида чироқ ва иссиқлик йўқлигини музокаралардан бош тортаётган Киев ҳукумати хатти-ҳаракатлари оқибати деб атади.
Изоҳ (0)