Яқин орада Туркия ва Сурия муносабатлари нормаллашиши мумкин, деди Туркия президенти Ражаб Тоййиб Эрдўғон.
«Энг яқин вақтда Мисрда бошлангани каби, шунга ўхшаш жараён Сурияда ҳам бошланиши мумкин. Сиёсатда хафагарчиликлар бўлмайди», — деб ёзди Эрдўғон Twitter’да.
Ироқ Курдистони ҳудудида ва Сурия шимолидаги Ҳалаб вилоятида 20 ноябрдан буён Туркия ҳарбий операцияси бўлиб ўтмоқда. Туркия ўзи террорчилик ташкилоти деб ҳисоблайдиган Курдистон ишчилар партияси позицияларига зарбалар бермоқда. Операция Истанбулнинг Бейўғли туманидаги Истиқлол кўчасида содир бўлиб, олти кишининг ўлимига олиб келган терактдан кейин бир ҳафта ўтиб бошланди. Туркия ҳукумати маълумотларига кўра, теракт Курдистон ишчилар партияси томонидан уюштирилган.
Анқара қайд этишича, махсус операциянинг мақсади Туркия фуқароларига қарши терактлар олдини олиш ва чегаралар хавфсизлигини таъминлаш. Мамлакат қуролли кучлари «террорчилар томонидан ҳужумлар учун база сифатида фойдаланилган» ҳудудларга авиазарбалар берган. 27 ноябрь куни Туркия мудофаа вазири Хулуси Акар операция бошидан буён 480 нафар жангари йўқ қилинганини айтди..
Сурия Туркиянинг ўз ҳудудидаги иштирокини кўп бора қоралаган. Хусусан, Сурия ТИВ Туркиянинг чегарадаги операцияларини этник тозалашларга қиёслаганди. 22 ноябрь куни Сурия парламенти халқаро қўмитаси раиси ўринбосари икки мамлакатнинг ҳарбий тўқнашуви хавфидан огоҳлантирганди.
Октябрда Туркия президентининг расмий вакили Иброҳим Калин Россия Эрдўғон ва Сурия президенти Башар Асад учрашувини ташкил қилиш учун ўз воситачилигини таклиф қилганини айтганди. Кейинроқ Hürriyet газетаси манбаларига таяниб, икки мамлакат етакчиларининг учрашуви Россияда Владимир Путин воситачилигида бўлиб ўтиши мумкинлигини маълум қилди.
Маълумот учун: Туркия ва Миср президентларининг тарихдаги биринчи учрашуви Қатарда бфутбол бўйича жаҳон чемпионати очилишида бўлиб ўтди, улар қўл бериб кўришди.
Туркия ва Миср муносабатлари Миср президенти Муҳаммад Мурсий 2013 йил июлида ҳокимиятдан ағдарилиб, ундан кейин юз берган қонли тўқнашувлардан сўнг ёмонлашган эди. Эрдўғон мисрлик ҳарбийларнинг ағдарилган давлат раҳбари тарафдорларига нисбатан хатти-ҳаракатларини кескин қоралаган. Ўша йилиёқ Анқара ва Қоҳира ўз элчиларини маслаҳатлашувлар баҳонасида чақириб олган, шундан кейин бир-бирларининг элчиларини persona non grata деб эълон қилган эди.
Изоҳ (0)