Қирғизистон мамлакат Қуролли кучлари учун Туркиядан бир қанча ҳужумчи дронлар, жумладан Aksungur ва Bayraktar сотиб олди, деб маълум қилди республика президенти Садир Жапаров.
«Хавфсизлигимизга таҳдид солган сўнгги воқеалар бизни мудофаа қобилияти ҳақида ўйлашга мажбур қилди, давр мамлакат мудофаа қобилиятини мустаҳкамлашни талаб қилмоқда. Қисқа вақт ичида мамлакат Қуролли кучлари учун «Тигр» зирҳли техникаси, Bayraktar ТB2, Bayraktar Akinci ва Aksungur учувчисиз учоқлари харид қилинди», — деди Жапаров Бишкекда бўлиб ўтган биринчи Халқ Қурултойи (Халқ Ассамблеяси) съездида.
Қирғизистон президентининг сўзларига кўра, мамлакат расмийлари қўшни давлатлар билан чегара муаммоларини ҳал қилиш масаласига дуч келмоқда.
«Чегарадаги можароларнинг сабаби чегара масаласининг ҳал этилмагани. Ҳозир олдимизда турган асосий вазифа — кейинги авлодларга қолдирмасдан, бу масалани қўшниларимиз билан ҳал қилиб олиш», — деди Жапаров.
Шу билан бирга, у Қирғизистон чегарадаги келишмовчиликларни тинч йўл билан ҳал этишни талаб қилишда давом этишини таъкидлади. «Чегара масаласини икки йўл билан ҳал қилиш мумкин – тинч, ҳудудлар алмашинуви йўли билан ёки уруш ва босқинчилик йўли билан», — қўшимча қилди у.
Туркиянинг Bayraktar ТB2 ҳужумчи дрони Қирғизистон Миллий хавфсизлик давлат қўмитаси (ГНКБ) чегара хизматига биринчи марта 2021 йил декабрь ойида олиб келинган. 31 март куни мамлакатнинг Иссиқкўл вилоятида дронлардан фойдаланган ҳолда ҳарбий машғулотлар ўтказилган. 13 сентябрь куни Қирғизистон президенти Садир Жапаров ГНКБ Чегара хизматининг дрон базасини очди.
Қирғизистон КХШТга аъзо давлатлардан биринчи бўлиб турк Bayraktar’ларини сотиб олди.
12 октябрь куни Қирғизистон Миллий хавфсизлик давлат қўмитаси раиси Қамчибек Ташиев ижтимоий тармоқдаги саҳифасида республика Туркиядан Bayraktar Akinci ҳужумчи дронларини сотиб олганини маълум қилди. У дрон ёнида тушган суратини илова қилди.
Aksungur разведка ва зарба берувчи восита сифатида ишлатилади, шунингдек, денгиз патруллари учун ҳам мўлжалланган. Дрон Turk Havacilik ва Uzay Sanayii томонидан ишлаб чиқарилади.
Изоҳ (0)