Пашинян КХШТ саммити якунлари бўйича декларацияни имзолашдан бош тортди

Арманистон бош вазири Никол Пашинян Коллектив хавфсизлик шартномаси ташкилоти (КХШТ) Коллектив хавфсизлик кенгашининг Арманистонга ёрдам кўрсатиш бўйича қўшма чора-тадбирлар ҳақидаги декларацияси лойиҳаси охиригача ишланмагани туфайли, уни имзолашдан бош тортди. Бу ҳақда Арманистон томони мажлис якунлари бўйича маълум қилди.

Пашинян КХШТ Коллектив хавфсизлик кенгаши (КХК) декларациясини ҳам имзоламаган, ташкилот бош котиби Станислав Зас ҳужжат деярли тайёр эканини, фақат унга бир қатор тузатишлар киритиш кераклигини айтди.

«КХШТ уставининг 3-моддасига мувофиқ, аъзо мамлакатлар ҳудудий яхлитлигини коллектив тарзда ҳимоя қилиш учун устуворлик сиёсий воситаларга берилади. Шунинг учун Арманистон КХШТ КХК қарори билан Озарбайжон томонидан ўз қўшинларини зудлик билан ва сўзсиз равишда Арманистон Республикаси ҳудудидан олиб кетиб, 2021 йил 11 май ҳолатидаги бошланғич позицияларга жойлаштиришга қаратилган зарур сиёсий-дипломатик ишлар олиб борилишини тезлаштиришни таклиф қиламиз», — деди КХК мажлисида Арманистон бош вазири.

Вазиятнинг сиёсий жиҳатдан аниқ баҳоланмаслиги ва юқорида тилга олинган қарорнинг қабул қилинмаслиги нафақат КХШТнинг иттифоқчилик мажбуриятларидан воз кечишини англатиши мумкин, балки Озарбайжон томонидан «Арманистонга қарши тажовузни давом эттириш учун КХШТ томонидан яшил чироқ сифатида» талқин қилиши ҳам мумкин, деди Никол Пашинян.

«Шунинг учун, шундан келиб чиқиб, ҳурматли ҳамкасблар, айни пайтда имзолаш учун тақдим этилган ‘Коллектив хавфсизлик кенгашининг Арманистонга ёрдам кўрсатиш бўйича қўшма чора-тадбирлар ҳақидаги декларацияси’ етарлича ишланмаган, деб ўйлайман ва ушбу ҳужжатларни бу кўринишида имзолашга тайёр эмасман», — деди Пашинян.

Тайёрланган 17 та якуний ҳужжатдан иккитаси қайта кўриб чиқишга юборилди, деди Арманистон бош вазири. «Биз тор доирадаги мажлисимизни тугатдик. 17 та қарор лойиҳаси тақдим этилди. 15 таси бўйича бизда консенсус бор. Иккита лойиҳа кам-кўстини тўлдиришга юборилди», — деди у. Унинг қайд этишича, тақдим этилган ҳужжатларнинг иккитаси имзоланмаган — уларнинг кам-кўстини тузатиб, шундан кейингина имзолаш учун тақдим этиш режалаштирилмоқда.

Озарбайжон ва Арманистон 2020 йил 10 ноябрда Россия воситачилигида Тоғли Қорабоғда урушни тугатиш ҳақида уч томонлама битим имзолаганди. Бу йил эса Озарбайжон ва Арманистон яна бир-бирини ўз позицияларини ўққа тутишда айбламоқда.