Америкалик ҳарбийларга алоқадор бўлганлар сохта Facebook ва Instagram аккаунтлари орқали АҚШ манфаатларини Марказий Осиё ва бошқа давлатларда илгари сураётган бўлиши мумкин. Meta компанияси тегишли ҳисоботни эълон қилди.
Маълум қилинишича, бу Meta’нинг онлайн таъсир операциясини хорижий ҳукуматга эмас, балки Вашингтонга боғлаётган ва кам учрайдиган ҳолат ҳисобланади. Ҳисоботга кўра, АҚШ армиясига алоқадор шахслар Facebook ва Instagram’да сохта аккаунтлар орқали Вашингтон манфаатларини қатор давлатларга ёйган.
Meta’нинг хавфсизлик сиёсатини бузгани учун 39 та Facebook аккаунти, 16 та саҳифа, иккита гуруҳ ва 26 та Instagram аккаунти ўчириб ташланган. Улар АҚШда ишга туширилиб, Афғонистон, Жазоир, Эрон, Ироқ, Қозоғистон, Қирғизистон, Россия, Сомали, Сурия, Тожикистон, Ўзбекистон ва Яман каби қатор мамлакатларни қамраб олган.
«Хоҳ хориж, хоҳ маҳаллий бўлсин, хавфсизлик гуруҳларимиз дунё бўйлаб онлайн операцияларни топиш ва йўқ қилишга эътибор қаратмоқда», дейилади компания ҳисоботида.
Тегишли операция Twitter, YouTube, Telegram, «ВКонтакте» ва «Одноклассники» каби кўплаб интернет хизматларида амалга оширилган.
«Биз бу фаолиятни минтақадаги ички текширувимиз доирасида аниқладик. Аккаунтлар ҳақидаги маълумотни Графика ва Стэнфорд интернет обсерваториясидаги мустақил тадқиқотчилар билан бўлишдик. Улар 2022 йил 24 августда ушбу тармоқ фаолияти ҳақидаги ўз хулосаларини интернетда эълон қилди. Гарчи бу операция ортидаги одамлар ўз шахсини яширишга уринган бўлса-да, терговимиз аккаунт эгалари АҚШ ҳарбийлари билан алоқадор шахслар эканини аниқлади», дейилади Meta ҳисоботида.
Изоҳ (0)