Гаага суди Нидерландия ҳарбийлари 2007 йилда Афғонистонни ноқонуний бомбардимон қилган деб топди

Нидерландия суди 23 ноябрь куни мамлакат аскарлари 2007 йил июнь ойида Афғонистоннинг Урузгон вилоятидаги турар жой мажмуасини ўққа тутганини ноқонуний деб топди. Бу ҳақда Reuters хабар берди.

Деярли икки йил аввал (2020 йил) Нидерландия Мудофаа вазирлиги прокуратурадан Урузгонда ўнлаб тинч аҳолининг ҳаётига зомин бўлган портлашни текширишни сўраган.

«Уйларнинг ўққа тутилиши учун Нидерландия масъул эди. Бу уйларда тинч аҳоли истиқомат қилгани маълум бўлди. Нидерландия ‘Толибон’ уйлардан ҳарбий мақсадларда фойдалангани ва шу тариқа портлаш ноқонуний эмаслигини илгари сурган», — дейилади Гаага суди баёнотида.

Суд қарорига кўра, Нидерландия бу уйлар «Толибон» томонидан фойдаланилганини изоҳламаган, шунинг учун портлаш ноқонуний ҳисобланади. Суд ҳарбийлардан Урузгондаги ҳужум қурбонлари учун товон пули талаб қилди. Пул миқдори кейинроқ белгиланиши таъкидланди.

Эслатиб ўтамиз, аввалроқ Афғонистоннинг тўрт нафар фуқароси ва бешинчисининг қариндошлари Нидерландияга қарши судга даъво аризаси билан мурожаат қилган. Улар 2007 йил июнь ойида Нидерландия қўшинлари «Толибон» билан тўқнашув чоғида содир этган ҳарбий жиноятлар учун товон ундиришни талаб қилган.

Нидерландия Мудофаа вазирлиги маълумотларига кўра, бу тўқнашувларда 250 га яқин одам, жумладан, бир голланд аскари ва 80 га яқин тинч афғон фуқароси ўлган. Нидерландия қўшинлари 2006 йилдан 2010 йилгача Халқаро хавфсизлик кучлари таркибида Урузгонда бўлган.

Маълумот ўрнида, Гаага суди бундан аввалроқ Малайзия самолёти 2014 йил Первомайск шаҳридан «Бук» ҳаво мудофаа тизими томонидан уриб туширилганини маълум қилганди.