Россиянинг БМТдаги доимий вакили Василий Небензя Россиянинг Украина инфратузилма объектларига зарбалари Киевга Ғарб томонидан қурол етказиб берилаётганига жавоб эканини айтди.
«Биз Украина инфратузилма объектларига бераётган зарбалар ушбу мамлакатнинг Ғарб қуроллари билан тўлдирилаётгани ва Киевнинг Россия устидан ҳарбий ғалаба қозониш ҳақидаги мулоҳазасиз даъватларига жавобан амалга оширилмоқда», — деди у БМТ Хавфсизлик кенгашининг Украина бўйича мажлисида.
«Россия хавфсизлиги ва ҳудудий яхлитлигига таҳдид солаётган Украина армияси жанговар қобилиятига путур етказиш — махсус ҳарбий операциянинг мақсадларидан бири. Ва Киев режими бизни махсус операция бошлашга мажбур қилган масалаларни музокаралар доирасида муҳокама қилиб, ечишга уриниш имконини берувчи реалистик позицияни эгалламагунича, у жанговар усуллар билан амалга оширилаверади», — дея қўшиб қўйди Небензя.
Шунингдек, Небензянинг айтишича, «турар жойларнинг вайрон бўлиши ва тинч аҳоли орасидаги талафотлар Украинанинг шаҳар ташқарисида эмас, балки унинг нақ марказида жойлашган ҳаво ҳужумига қарши мудофаа тизими айби билан юз бермоқда».
«Натижада ракеталар бўлаклари ёки ўз изидан чиқиб кетган Украина ракеталари Россия нишонга олмаган объектларга бориб тегмоқда», — деди у.
Украина президенти Владимир Зеленский эса Хавфсизлик кенгаши мажлисида видеоалоқа орқали чиқиш қилиб, ўз навбатида, БМТдан ўта муҳим инфратузилма ҳолатини ўрганиш учун Украинага экспертлар миссиясини юборишни сўради.
Россия октябрь бошидан бери Украина энергетика инфратузилмасига ёппасига зарбалар бермоқда. Бундай ҳужумларнинг сўнггиси 23 ноябрда содир бўлди. Зеленскийнинг айтишича, Россия 67 та ракета учирган, оқибатда Киев, Одесса ва Чернигов вилоятлари электрдан узилиб қолган.
Изоҳ (0)