АҚШ Эрон ҳукуматини Ироқ ҳудудий яхлитлигини бузишни тўхтатиб, Ироқ Курдистони ҳудудига зарбалар беришни бас қилишга чақирди. Бу ҳақда АҚШ Давлат департаменти матбуот хизмати раҳбари Нед Прайснинг баёнотида айтилади.
«Эрон 20 ноябрдан 22 ноябрга қадар Ироқ Курдистонига ҳалокатли ҳужумларни амалга ошириб, Ироқ ҳудудий яхлитлигини бузишда давом этмоқда. АҚШ Ироқ ҳудудий яхлитлигининг кўп маротаба ва қўпол равишда бузилишларини қатъий қоралайди ва Эронни бундан кейин таҳдидлар ва зўравонликлардан тийилишга чақиради», — деди Прайс.
Ироқ Курдистонига зарбалар ҳақида Ироқнинг ИНА агентлиги 21 ноябрга ўтар кечаси хабар берди. Нашр маълумотларига кўра, зарбалар Эрбил ва Сулаймония вилоятларида курд партиялари бош қароргоҳларига берилган. Эрон ҳукумати уларни мамлакатдаги ҳукуматга қарши намойишларни қўллаб-қувватлашда айбламоқда.
Шу билан бир вақтда, Ироқнинг Шафақ News агентлиги хабар қилишича, Эрон ҳарбийлари Эрбил вилоятида жойлашган Бахирка шаҳрида қочқинлар лагерига зарба берган. Жабрланганлар борлиги айтилмоқда. АҚШнинг Эрбилдаги консуллиги биносида ҳаво тревогаси сиреналари ишга тушган.
22 ноябрь куни Ислом инқилоби посбонлари корпуси (Эрон Қуролли кучлари элита қисмлари) қуруқлик қўшинлари қўмондони Муҳаммад Пакпур Эроннинг Ироқ Курдистонига ҳужумлари ислом республикаси миллий хавфсизлигига нисбатан «таҳдид бартараф этилмагунича» давом этишини айтди.
Ироқ Курдистони — Ироқ шимолида жойлашган мухтор ҳудуд. Шимолда Туркия, ғарбда Сурия, шарқда эса Эроннинг Курдистон вилояти билан чегарадош.
Эрон томонидан зарбалардан ташқари, Ироқ Курдистони ҳудудида ва Сурия шимолидаги Ҳалаб вилоятида 20 ноябрдан буён Туркия ҳарбий операцияси бўлиб ўтмоқда. Туркия ўзи террорчилик ташкилоти деб ҳисоблайдиган Курдистон ишчилар партияси позицияларига зарбалар бермоқда. Операция Истанбулнинг Бейўғли туманидаги Истиқлол кўчасида содир бўлиб, олти кишининг ўлимига олиб келган терактдан кейин бир ҳафта ўтиб бошланди. Туркия ҳукумати маълумотларига кўра, теракт Курдистон ишчилар партияси томонидан уюштирилган.
Изоҳ (0)