Украина энергия тизимига Россиянинг ракета зарбалари билан етказилган зарар 70 миллиард гривнадан ошади (қарийб 1,9 миллиард доллар). Бундай рақамларни Украина бош вазири Денис Шмигаль ҳукумат мажлисида келтириб ўтди.
Унинг сўзларига кўра, «Укрэнерго» тармоқларини қайта тиклаш устида ҳозир 70 та таъмирлаш бригадалари ёки мингдан ортиқ мутахассислар ишламоқда. Бу ишлар доирасида бутун мамлакат бўйлаб электрнинг вақтинчалик ўчириб қўйилиши давом этмоқда. Шу билан бирга, Шмигаль қайд этишича, совуқ ҳаволар бошлангани ва фуқаролар томонидан электр энергияси истеъмоли ошгани сабабли, авариявий ўчишлар ҳам истисно қилинмаяпти.
Шунингдек, бош вазир электр энергияси Украинанинг баъзи шаҳарларида бошқаларига нисбатан кўпроқ ўчиши сабабини тушунтирди.
«Қисқа ва лўнда қилиб айтадиган бўлсам, электр энергиясини ишлаб чиқарадиган станция билан якуний истеъмолчи сифатида бизнинг уйларимиз ўртасида электр энергиясини транспорт қилувчи қуйи станциялар ва тармоқлар бор. Россиялик террорчилар айнан шу объектларга ҳужум қилмоқда. Шунинг учун айрим вилоятлар ёки туманларга катта миқдорда электр энергиясини узатиш имкони йўқ. Шу сабабли чекловлар мамлакат бўйлаб нотекис амалга ошмоқда», — дея аниқлик киритди у.
Аввалроқ Шмигаль Россия зарбалари оқибатида Украина энергия тизимининг қарийб 50 фоизи издан чиққанини айтганди.
Россия Мудофаа вазирлиги 10 октябрдан буён Украинанинг ҳарбий ва энергетика объектларига мунтазам ракета зарбалари бериб келмоқда ва буни 8 октябрь куни Керчь бўғозидаги Қрим кўприги портлатилишига жавоб деб атамоқда.
Украина ҳукумати маълумотларига кўра, 15 ноябрь куни Россия мамлакат энергетика тизимига уруш бошидан буён энг кучли зарбани берган. Ўққа тутишлар фонида Украинада электр энергияси вақти-вақти билан ўчириб қўйилмоқда.
Россия президенти матбуот котиби Дмитрий Песков Украинанинг кўплаб ҳудудларида чироқ ва иссиқлик йўқлигини музокаралардан бош тортаётган Киев ҳукумати хатти-ҳаракатлари оқибати деб атади.
Изоҳ (0)