Бирлашган Миллатлар Ташкилоти (БМТ) Эроннинг икки ойдан бери мамлакатда давом этаётган оммавий норозилик намойишларига нисбатан «шафқатсиз ва ўлимга олиб келувчи» қарорларини қоралади. Бу ҳақда The Times of Israel хабар берди.
«БМТнинг инсон ҳуқуқлари бўйича котиби Волкер Туркнинг айтишича, ҳафта охирида Эрондаги намойишлар оқибатида ҳалок бўлганлар сони ортиб бораётгани, хавфсизлик кучларининг жавоб чоралари кучайтирилгани мамлакатдаги вазиятни кескин баҳолайди», — деди БМТ расмий вакили Жереми Лоуренс.
Ташкилот Эрон ҳукуматини халқнинг тенглик, қадр-қиммат ва ҳуқуқ талабларини қондиришга, «норозилик намойишларини бостириш учун кераксиз ёки номутаносиб куч» ишлатмасликка чақирган.
«Эронда инсон ҳуқуқларининг қўпол бузилиши учун жавобгарликнинг йўқлиги норозиликнинг кучайишига ёрдам беради», — дейди ташкилот вакили.
БМТ ҳуқуқ идораси норозилик намойишлари бошланганидан бери 300 дан ортиқ одам, жумладан 40 дан ортиғи болалар ҳалок бўлганини маълум қилди.
Эрондаги намойишларга нима сабаб бўлди?
Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган.Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда.
Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаган.
Ўз навбатида, Эрон ҳукумати тартибсизликларга алоқадор олти кишини ўлимга ҳукм қилган.
Изоҳ (0)