AQSH Eron hukumatini Iroq hududiy yaxlitligini buzishni to‘xtatib, Iroq Kurdistoni hududiga zarbalar berishni bas qilishga chaqirdi. Bu haqda AQSH Davlat departamenti matbuot xizmati rahbari Ned Praysning bayonotida aytiladi.
“Eron 20-noyabrdan 22-noyabrga qadar Iroq Kurdistoniga halokatli hujumlarni amalga oshirib, Iroq hududiy yaxlitligini buzishda davom etmoqda. AQSH Iroq hududiy yaxlitligining ko‘p marotaba va qo‘pol ravishda buzilishlarini qat’iy qoralaydi va Eronni bundan keyin tahdidlar va zo‘ravonliklardan tiyilishga chaqiradi”, — dedi Prays.
Iroq Kurdistoniga zarbalar haqida Iroqning INA agentligi 21-noyabrga o‘tar kechasi xabar berdi. Nashr ma’lumotlariga ko‘ra, zarbalar Erbil va Sulaymoniya viloyatlarida kurd partiyalari bosh qarorgohlariga berilgan. Eron hukumati ularni mamlakatdagi hukumatga qarshi namoyishlarni qo‘llab-quvvatlashda ayblamoqda.
Shu bilan bir vaqtda, Iroqning Shafaq News agentligi xabar qilishicha, Eron harbiylari Erbil viloyatida joylashgan Baxirka shahrida qochqinlar lageriga zarba bergan. Jabrlanganlar borligi aytilmoqda. AQSHning Erbildagi konsulligi binosida havo trevogasi sirenalari ishga tushgan.
22-noyabr kuni Islom inqilobi posbonlari korpusi (Eron Qurolli kuchlari elita qismlari) quruqlik qo‘shinlari qo‘mondoni Muhammad Pakpur Eronning Iroq Kurdistoniga hujumlari islom respublikasi milliy xavfsizligiga nisbatan “tahdid bartaraf etilmagunicha” davom etishini aytdi.
Iroq Kurdistoni — Iroq shimolida joylashgan muxtor hudud. Shimolda Turkiya, g‘arbda Suriya, sharqda esa Eronning Kurdiston viloyati bilan chegaradosh.
Eron tomonidan zarbalardan tashqari, Iroq Kurdistoni hududida va Suriya shimolidagi Halab viloyatida 20-noyabrdan buyon Turkiya harbiy operatsiyasi bo‘lib o‘tmoqda. Turkiya o‘zi terrorchilik tashkiloti deb hisoblaydigan Kurdiston ishchilar partiyasi pozitsiyalariga zarbalar bermoqda. Operatsiya Istanbulning Beyo‘g‘li tumanidagi Istiqlol ko‘chasida sodir bo‘lib, olti kishining o‘limiga olib kelgan teraktdan keyin bir hafta o‘tib boshlandi. Turkiya hukumati ma’lumotlariga ko‘ra, terakt Kurdiston ishchilar partiyasi tomonidan uyushtirilgan.
Izoh (0)