АҚШнинг собиқ президенти Дональд Трамп 2019 йил 30 августда Twitter’да Эронда муваффақиятсиз учирилган ракетанинг сунъий йўлдошдан олинган суратини ноқонуний равишда жойлаштиргани аниқланди. Бу ҳақда Al Mayadeen хабар берди.
Расмда учириш майдончасида портлаган ракета акс этган. Трамп бу тасвирни АҚШнинг воқеага алоқадор эмаслигини исботлаш учун жойлаштирган.
«АҚШ Эрондаги Семнан Launch Site One майдонида Safir Launch ракетасининг ҳалокатга учрашига алоқадор бўлмаган. Эронга эзгу тилаклар ва Site One'даги воқеаларни аниқлашда омад тилайман», — деб ёзганди Трамп.
Тасвир юқори аниқликдалиги учун баъзи мутахассислар у сунъий йўлдошдан олинмаганини прогноз қилган.
«Расмда жуда кўп деталлар акс этган. У дрон ёки бошқа қурилма орқали суратга олинган бўлса керак, деб ўйладим. АҚШнинг бутун разведка ҳамжамияти бу маълумотни очиқлашни истамайди. Президент суратни твит қилади деган фикрни қабул қилиш жуда қийин», — дейди Калифорниядаги Мидлбери халқаро тадқиқотлар институтида сунъий йўлдош тасвирларини ўрганувчи Жефри Льюис.
«Собиқ президент Трампнинг ҳаракати ўзига хос эҳтиётсизлигини ва у қўлга киритган разведка маълумотларига нисбатан ҳурматсизликни тасдиқлайди», — дейди Америка олимлари федерациясининг махфийлик ва таснифлаш бўйича мутахассиси Стивен Афтергуд.
«Мен бу одамга махфий маълумотларни айтмаган бўлардим. У яна махфий маълумотларга кириш имкониятига эга бўлиши мумкин деган фикр асабийлаштирмоқда», деди Льюис.
Эслатиб ўтамиз, АҚШ собиқ президенти Дональд Трампнинг Twitter’даги аккаунти 2021 йилда блокланганди. Илон Маск сиёсатчининг аккаунтини қайта ишга тушириш бўйича Twitter’даги сўровнома ортидан Трампнинг аккаунтини тиклади.
Изоҳ (0)