Польша расмийлари Россия ташқи ишлар вазири Сергей Лавровни Европада хавфсизлик ва ҳамкорлик ташкилотининг (ЕХҲТ) ташқи ишлар вазирлари кенгаши йиғилишига киритмайди. Бу ҳақда «РБК» хабар берди.
Йиғилиш Лодз шаҳрида 1 декабрь куни бўлиб ўтади. Польша тадбирда Европа Иттифоқи санкциясига киритилган амалдорлар иштирок эта олмаслигини маълум қилди. Сергей Лавров Россиянинг Украинага қилган ҳужуми ортидан февралда санкциялар рўйхатига киритилганди. Россия ташқи ишлар вазирлиги бунга муносабат билдириб, мазкур қарорни «қабул қилиб бўлмайдиган ҳужум» деб атади. ТИВ бу Польшанинг 2022 йилдаги ЕХҲТга раис давлат мақомига мос келмаслигини қайд этди.
Россия дипломатлари Варшава қарорига баҳо бериш учун ташкилотнинг бошқа вакилларига мурожаат қилди. Лавров ўрнига ЕХҲТ йиғилишига Россиянинг ташкилотдаги доимий вакили Александр Лукашевич қатнашади.
16-нойбар куни Индонезиянинг Бали оролида бўлиб ўтган G20 саммитида биргина дипломат Россия ташқи ишлар вазири Сергей Лавров билан учрашганди, у ҳам бўлса Хитой ташқи ишлар вазири Ван И бўлган. Россия ташқи ишлар вазири БМТ бош котиби Антониу Гутерриш билан учрашувда Украинадаги можарони ҳал қилиш масаласида мувозанатли ва холис чизиққа амал қилиши кераклигини айтган.
Изоҳ (0)