Германия Россия билан ўртасида уруш бошланган тақдирда қўллайдиган мудофаа ҳаракатлари режасини тайёрлади. Бу ҳақда Der Spiegel нашри хабар берди.
Нашр Германия қуролли кучлари бош инспектори генерал Эберхард Зорн томонидан имзоланган 68 саҳифалик ҳужжатни назарда тутмоқда. Унда агар Москва Берлинга ҳужум қилса, немис томони жуда катта зарар кўриши келтирилган.
«Германияга ҳужум огоҳлантиришсиз содир бўлиши ва мамлакатга катта зарар етказиши мумкин. Россияни тўхтатиб туришда махсус сценарий учун тайёрланган ва ўқитилган кучлар жалб қилинади. Ҳисоботда кичик бўлинмаларнинг хорижий миссияларда иштирок этиши ҳозирги сиёсий муҳитга мос келмаслиги келтирилади», дейилади хабарда.
Ҳужжатга таяниб, Der Spiegel янги ҳаракатлар режаси нафақат ҳарбий харажатларни ошириш, балки йирик тузилмалар яратишни, жумладан 10 минг кишигача бўлган дивизияни ҳам назарда тутишини таъкидлади.
Март ойида АҚШ ва НАТОнинг бошқа иттифоқчилари Россиянинг альянсга аъзо давлатлар ҳудудига эҳтимолий ҳужумига тайёргарлик кўрганди. Оқ уйнинг миллий хавфсизлик бўйича маслаҳатчиси Жейк Салливан АҚШ президенти Жо Байденнинг Польшага ташрифи чоғида бу бўйича маълумот берганди.
«Биз Россиянинг НАТО ҳудудига зарба беришга қарор қилиши эҳтимоли бўйича фавқулодда вазиятларни режалаштирмоқдамиз. Президент Байден, агар Россия НАТОга ҳужум қилса, иттифоқимизнинг бошқа аъзолари билан биргаликда жавоб беришга тайёрлигини айтди», — деган Салливан.
Ўз навбатида, Молдова президенти Майя Санду ҳам Россиянинг мамлакатга ҳужум қилиш эҳтимолини баҳолаганди. У Москва ҳужум қилишни режалаштираётгани ҳақида маълумот йўқлигини қайд этган.
Изоҳ (0)