Болгарияда Истанбулдаги терактни ташкиллаштиришда иштирок этганликда гумон қилиниб, беш киши қўлга олинди. Бу ҳақда Deutsche Welle хабар берди.
Прокуратура маълумотига кўра, қўлга олинганларнинг уч нафари Молдова фуқаролари. Яна бир эркак ва аёл эса суриялик ҳамда курд миллатига мансуб. Бош прокурор Иван Гешев гумонланувчиларга «бошқа давлатдаги террорчилик ҳаракатларини қўллаб-қувватлаш» ва «одам савдоси» айбловлари қўйилганини айтди. Туркия прокуратураси Болгария ҳукуматидан гумондорларнинг бир қисмини экстрадиция қилишни сўраган.
Юқоридаги беш нафар шахсдан тўрт нафари 72 соат ҳибсга олинган, шу билан бирга уларни муддатсиз қамоққа олиш учун судга ариза юборилган. Соғлиғида муаммоси бўлган аёлга енгилроқ профилактика чораси қўлланилди.
Ҳозирда ҳеч қайси гуруҳ портлаш учун жавобгарликни ўз зиммасига олмади. Туркия ҳукумати айбни Курдистон Ишчилар партияси (ПКК) ва унинг Сурия бўлимидаги жангарилари зиммасига юклаган. Ҳар икки гуруҳ ҳам бунга алоқадорлигини рад этади.
Эслатиб ўтамиз, 13 ноябрь куни Истанбулнинг марказий Беёғлу туманидаги пиёдалар учун мўлжалланган Истиқлол кўчасида портлаш содир бўлди. Олти киши ҳалок бўлди, 81 киши яраланди. Мамлакат расмийлари ҳодисани теракт сифатида баҳолади. Ўзбекистон президенти Шавкат Мирзиёев Истанбулда юз берган портлаш оқибатида кўплаб инсонлар қурбон бўлгани ва жиддий жароҳат олгани муносабати билан Ражаб Тоййиб Эрдўғонга таъзия йўллади.
Мавзуга доир:
Изоҳ (0)