Бирлашган Миллатлар Ташкилотининг иқлим ўзгариши бўйича COP27 конференцияси иштирокчилари ривожланаётган мамлакатларнинг иқлим ўзгариши салбий таъсиридан кўрган йўқотишлари ва зарарларини қоплаш учун жамғарма яратишга келишиб олди.
Мисрда ўтказилган COP27 иқлим бўйича музокараларнинг сўнгги куни, 18 ноябрда бу масала муваффақиятсизликка учрашига оз қолди, бироқ конференция яна бир кунга чўзилганидан сўнг томонлар «иқлим зарарини тўлаш бўйича тарихий келишув»га эришди, деб ёзади Bloomberg. Келишув 20 ноябрь куни эрталаб тузилган.
Жамғарма кучсиз мамлакатларга бўронлар, тошқинлар ва «ривожланган мамлакатларнинг тарихий углерод чиқиндилари оқибатида юзага келган бошқа офатлар» билан курашишда ёрдам бериш учун яратилди, деб таъкидлайди Reuters.
Associated Press хабарига кўра, дастлаб жамғарма ривожланган мамлакатларнинг, шунингдек, жисмоний шахслар, жамоат ташкилотлари ва халқаро молия институтларининг бадаллари ҳисобидан шакллантирилади.
Изоҳ (0)