АҚШнинг собиқ президенти Дональд Трамп Республика яҳудий кенгаши тарафдорлари конференциясида нутқ сўзлаб, яна давлат раҳбари бўлса, Яқин Шарқда нима ўзгаришини айтди. Бу ҳақда Haaretz хабар берди.
Трамп, агар у иккинчи муддатга сайланса, «сайловдан кўп ўтмай, барча араб мамлакатларини, жумладан, Саудия Арабистонини Исроил ва Амирликлар ўртасида тинчлик шартномасига қўшиши мумкинлигини айтди.
«Байден маъмурияти улардан ҳеч бирини бу келишувга қўшмаган. Биз ҳақиқатан ҳам Яқин Шарқда тинчлик ўрнатишимиз мумкин эди», — дейди Трамп.
Бундан ташқари, у нутқида амалдаги президент Жо Байденни ҳам танқид қилиб, уни «Исроилга ва яҳудий жамиятига хиёнат қилишда» айблади.
«Менинг бошқарувимда Исроил ва яҳудий жамияти учун тарихда ҳеч бир президент қилмаган тарзда курашдик», — дейди собиқ президент.
Бундан ташқари, Трамп АҚШ яҳудийлари унинг Исроил учун қилган ишларини етарлича қадрламаганини такрорлади.
«Яҳудийлар Исроилни керакли даражада қадрламайди», — дея хулоса қилди сиёсатчи.
Маълумот ўрнида, АҚШнинг собиқ раҳбари Дональд Трамп мамлакат президентлигига ўз номзодини кўрсатиш учун ариза топширди. Сиёсатчи давлат раҳбари бўлса, сайлов тизимини ислоҳ қилишга ваъда берди. Иванка Трамп отасининг сайлов кампаниясида қатнашишдан бош тортди. Байден эса Трампнинг АҚШ президентлигига номзоди кўрсатилганига муносабат билдириб, унинг «ютуқларини» санаб ўтди.
Изоҳ (0)