Шавкат Мирзиёев Парижга етиб боргач, Франция тараққиёт агентлиги раҳбарияти (хусусан, агентлик бош ижрочи директори Реми Риу) билан учрашув ўтказмоқда. Бу ҳақда президент матбуот котиби хабар берди.
Қайд этилишича, музокаралар якунида умумий қиймати 1 миллиард евродан зиёд бўлган «яшил» иқтисодиёт ва хусусий сектор лойиҳаларини амалга ошириш кўзда тутилган 2025 йилгача стратегик ҳамкорлик дастури қабул қилиниши кутилмоқда.
Учрашувда давлат-хусусий шериклик механизмларини жорий қилишга алоҳида эътибор қаратилмоқда.
Ўзбекистон ҳукумати ва Франция тараққиёт агентлиги ўртасида қишлоқ хўжалиги, энергетика, «яшил» иқтисодиёт, шаҳарларни ривожлантириш, сув таъминоти, банк-молия ва транспорт соҳаларида аниқ лойиҳаларни амалга оширишни назарда тутадиган умумий қиймати 1 миллиард евродан ортиқ бўлган 2025 йилгача стратегик ҳамкорлик дастурини имзолаш маросими бўлиб ўтди.
Маълумот учун, ташриф кунлари Франция пойтахтидаги жаҳонга машҳур Лувр музейи ва нуфузли Араб дунёси институтида Ўзбекистоннинг бой маданий ва тарихий меросига бағишланган «Ўзбекистон воҳалари хазиналари. Карвон йўллари чорраҳасида» ва «Самарқандга йўл. Ипак ва олтин мўъжизалари» ноёб кўргазмалар очилади.
Давлат раҳбарининг Францияга расмий ташрифи давомида таълим, илм-фан, маданий мерос, фуқаро авиацияси, давлат хизмати ва коррупцияга қарши курашиш соҳаларида ҳамкорликка оид 14 та ҳужжат имзоланиши режалаштирилган.
Мавзуга доир: Шавкат Мирзиёев рафиқаси билан Францияга етиб борди (фото)
Изоҳ (0)