Шавкат Мирзиёев 21 ноябрь куни Франция президенти Эммануэль Макроннинг таклифига биноан расмий ташриф билан ушбу мамлакатга етиб борди. Бу ҳақда президент матбуот хизмати хабар бермоқда.
Давлат раҳбарини Франция юқори мартабали расмий шахслари кутиб олди.
Кун тартибидан конструктив сиёсий мулоқотни янада ривожлантириш, кўп қиррали ҳамкорликни кенгайтириш, энг аввало, иқтисодиётнинг турли тармоқларида инвестиция лойиҳаларини амалга ошириш, фаол гуманитар ва таълим алмашинувларини давом эттириш масалалари ўрин олган.
Ташриф кунлари Франция пойтахтидаги жаҳонга машҳур Лувр музейи ва нуфузли Араб дунёси институтида Ўзбекистоннинг бой маданий ва тарихий меросига бағишланган «Ўзбекистон воҳалари хазиналари. Карвон йўллари чорраҳасида» ва «Самарқандга йўл. Ипак ва олтин мўъжизалари» ноёб кўргазмалар очилади.
Давлат раҳбарининг Францияга расмий ташрифи давомида таълим, илм-фан, маданий мерос, фуқаро авиацияси, давлат хизмати ва коррупцияга қарши курашиш соҳаларида ҳамкорликка оид 14 та ҳужжат имзоланиши режалаштирилган.
Аввалроқ Шавкат Мирзиёев Францияга жўнаб кетгани ҳақида хабар берилган эди.
Изоҳ (0)