АҚШ Украинага 20 миллиард доллардан ортиқ ҳарбий ёрдам кўрсатди ва қанча вақт керак бўлса, шунча вақт Киевни қўллаб-қувватлашда давом этади. Бу ҳақда АҚШ мудофаа вазири Ллойд Остин Индонезияда ўтказилган матбуот анжуманида маълум қилди.
«Ҳозирги вақтгача Украинага 20 миллиард доллардан ортиқ ёрдам бердик. Баёнотларимизни эшитгансиз: Биз Украинани қанча керак бўлса, шунча вақт қўллаб-қувватлашда давом этамиз», — деди Пентагон раҳбари.
Остиннинг сўзларига кўра, НАТО ва бошқа давлатлар Украинага, жумладан, Ғарб давлатларининг алоқа гуруҳи воситачилигида фаол ёрдам бермоқда.
У Украинани қўллаб-қувватлаш — халқаро вазифа эканини таъкидлади. Унинг сўзларига кўра, Вашингтон Киев унга кўрсатилаётган ҳарбий ёрдамдан фойдаланаётганини ва Украина Қуролли кучлари жанг майдонида «муваффақият кўрсатаётганини» кўриб турибди.
Август ойида АҚШ Давлат котиби Энтони Блинкен Жо Байден президентлиги даврида АҚШнинг Украинага берган ҳарбий ёрдами миқдори 10 миллиард доллардан ошганини айтганди.
18 ноябрь куни республикачилар АҚШ Украинага ёрдам учун юборган «ҳар бир доллар»нинг текширилишини талаб қилиб чиқди.
Республикачилар партияси вакили Маржори Тэйлор Грин Украина Американинг 51-штати эмаслигини таъкидлади. Уни қўллаб-қувватлаш учун юборилган америкалик солиқ тўловчиларнинг пулларини эса, дипломатнинг сўзларига кўра, АҚШ жанубий чегараси ҳимоясини кучайтиришга сарфлаш мумкин эди.
Изоҳ (0)