Қорақалпоғистон Республикаси Нукус шаҳрида ота фарзандининг 18 ёшига қадар тўлаши керак бўлган алиментини олдиндан қоплаб берди. Бу ҳақда Мажбурий ижро бюроси матбуот хизмати хабар қилди.
Қайд этилишича, Фуқаролик ишлари бўйича Нукус туманлараро судининг ижро ҳужжатига асосан қарздор А.Б.дан унинг собиқ турмуш ўртоғининг фойдасига бир нафар фарзандининг таъминоти учун у вояга етгунига қадар алимент ундириш белгиланган.
Қарздор ота Мажбурий ижро бюроси Нукус шаҳар бўлимига келиб, фарзанди 18 ёшгача тўлгунга қадар тўлаши лозим бўлган алимент пулларини олдиндан тўлаш истагини билдирган.
Таъкидлаш жоиз, Ўзбекистон Республикаси Вазирлар Маҳкамасининг 808-сонли қарорига мувофиқ фарзанди вояга етгунига қадар тўланиши лозим бўлган алимент пулларини олдиндан тўлаши мумкин. Ушбу фуқаронинг келгуси 13 йил давомида тўлаши лозим бўлган алимент пуллари 2 миллиард 270 миллион 812 минг сўмни ташкил этган.
Шундан сўнг, аёл МИБ Нукус шаҳар бўлимига келиб, ҳисоблаб чиқилган 2 миллиард сўмдан ортиқ алимент пулларини собиқ турмуш ўртоғидан олганини маълум қилган.
“Ушбу алимент учун тўланган сумма бюро тарихида ҳозирча энг йирик миқдордаги тўлов бўлиб қолмоқда”, дейилади хабарда.
Аввалроқ Андижонда алиментдан қочиб юрган эркакни ушлаш учун “романтик учрашув” уюштирилгани тўғрисида хабар қилинганди. У 59 миллион сўмлик алиментни тўламай қочиб юрган.
Изоҳ (0)