8 ноябрь куни АҚШ ҳарбий-денгиз флоти Эрондан Яманга 70 тоннадан зиёд аммоний перхлоратини ташиб кетаётган балиқчи кемасини тўхтатиб қолган эди. Ушбу модда ракета, ракета ёнилғиси, шунингдек, портловчи моддалар ишлаб чиқариш учун қўлланилади, деб ёзади «Хроника Туркменистана».
Кемада 100 тоннадан ортиқ карбамид ўғити (мочевина) ҳам топилган. Мочевина — қишлоқ хўжалигида фойдаланиладиган кимёвий бирикма бўлиб, у портловчи моддалар прекурсори (таркибига қўшиладиган модда) сифатида қўлланилиши мумкин.
Turkmennews нашри эълон қилинган фотосуратларда карбамид ўғитлар солинган қопларга «Туркманистонда ишлаб чиқарилган» деган ёзув туширилганига эътибор қаратди.
Кимёвий модда ишлаб чиқарувчиси сифатида «Марикарбамид» заводи кўрсатилган.
Аниқланган моддалар катталигига қараб, 12 тадан ортиқ ўрта масофали баллистик ракеталар учун ёнилғи ишлаб чиқаришга етган бўларди, деди АҚШ Ҳарбий-денгиз кучлари Марказий қўмондонлиги қўмондони, вице-адмирал Бред Купер.
АҚШ ҲДК пресс-релизида қайд этилишича, кема ва унинг тўрт нафар яманлик экипажи аъзолари Эрондан азалдан Ямандаги хусийлар учун қурол етказиб беришда фойдаланилган йўналиш бўйлаб ўтаётганида ушлаб қолинган. Хусийларга қурол-яроғларнинг бевосита ёки билвосита етказилиши, сотилиши ёки берилиши БМТ Хавфсизлик кенгаши резолюциясига ва халқаро ҳуқуққа зиддир.
Охир-оқибат, қўлга олинган кема чўктириб юборилган, чунки АҚШ ҳарбийлари у тижорий кемалар қатнови учун хавф туғдиради, деган хулосага келди.
Нашр қайд этишича, Туркманистонда Карбамид «Марикарбамид», «Теженкарбамид» ва Гарабогазкарбамид» заводларида ишлаб чиқарилади. 2021 йил сентябрида президент Гурбангуло Бердимуҳамедовга ушбу корхоналар ички бозор эҳтиёжларини қондираётгани ва ўз маҳсулотларининг асосий қисмини чет элга экспорт қилаётгани ҳақида ҳисобот берилганди.
Изоҳ (0)