Европа Иттифоқи Россиянинг умумий қиймати 68 миллиард евролик активларини музлатиб қўйди, уларнинг аксарияти Бельгияда. Бу ҳақда Европа комиссиясининг ички ҳужжатига таяниб, Politico хабар бермоқда.
Қайд этилишича, Бельгияда Россиянинг 50 миллиард евролик активлари музлатиб қўйилган, Люксембургда бу кўрсаткич 5,5 миллиард еврога тенг.
Бу икки давлат умумий музлатилган активларнинг 80 фоиздан ортиғини ташкил қилади. Музлатилган активлар орасида Алишер Усмоновга тегишли Дилбар яхтаси ҳам бор.
Германия ҳукумати Европа Иттифоқи санкциясига учраган миллиардернинг 156 метрлик яхтасини хатловга олганди.
Шу билан бирга, Еврокомиссия Европа Иттифоқида қанча Россия миллий захиралари музлатилганини аниқ билмайди. Ҳужжатларга кўра бу кўрсаткич 33,8 миллиард евро, бироқ рақамлар текширилиши керак.
Октябр ойи охиригача Европа Иттифоқи санкциялар остида қолган шахслар ва ташкилотларнинг жами 17 миллиард евролик активларини музлатиб қўйди, — деди Европа Иттифоқининг адолат ва қонун устуворлиги бўйича комиссари Дидье Рейндерс.
Унинг сўзларига кўра, ЕИга аъзо етти давлатда жами 90 кишининг мулки музлатиб қўйилган, жумладан, Германияда 2,2 миллиард евро.
Энди Еврокомиссия Европа Кенгаши томонидан санкциялардан бўйин товлашни ЕИда жиноят деб тан олиш тўғрисидаги қарорни маъқуллашини кутмоқда. Бу суд қарори билан активларни мусодара қилишни соддалаштиради.
Рейндерснинг таъкидлашича, агар Европа Иттифоқи санкциясига эга шахсларнинг музлатилган активлари жиноий йўл билан қўлга киритилган деб эътироф этилса ва мусодара қилинса, улар Украина учун компенсация жамғармасига ўтказилиши мумкин.
Аввалроқ Германия Россиянинг 4,8 миллиард евролик активларини музлатиб қўйгани маълум бўлган эди.
Изоҳ (0)