Yevropa Ittifoqi Rossiyaning umumiy qiymati 68 milliard yevrolik aktivlarini muzlatib qo‘ydi, ularning aksariyati Belgiyada. Bu haqda Yevropa komissiyasining ichki hujjatiga tayanib, Politico xabar bermoqda.
Qayd etilishicha, Belgiyada Rossiyaning 50 milliard yevrolik aktivlari muzlatib qo‘yilgan, Lyuksemburgda bu ko‘rsatkich 5,5 milliard yevroga teng.
Bu ikki davlat umumiy muzlatilgan aktivlarning 80 foizdan ortig‘ini tashkil qiladi. Muzlatilgan aktivlar orasida Alisher Usmonovga tegishli Dilbar yaxtasi ham bor.
Germaniya hukumati Yevropa Ittifoqi sanksiyasiga uchragan milliarderning 156 metrlik yaxtasini xatlovga olgandi.
Shu bilan birga, Yevrokomissiya Yevropa Ittifoqida qancha Rossiya milliy zaxiralari muzlatilganini aniq bilmaydi. Hujjatlarga ko‘ra bu ko‘rsatkich 33,8 milliard yevro, biroq raqamlar tekshirilishi kerak.
Oktyabr oyi oxirigacha Yevropa Ittifoqi sanksiyalar ostida qolgan shaxslar va tashkilotlarning jami 17 milliard yevrolik aktivlarini muzlatib qo‘ydi, — dedi Yevropa Ittifoqining adolat va qonun ustuvorligi bo‘yicha komissari Didye Reynders.
Uning so‘zlariga ko‘ra, YIga a’zo yetti davlatda jami 90 kishining mulki muzlatib qo‘yilgan, jumladan, Germaniyada 2,2 milliard yevro.
Endi Yevrokomissiya Yevropa Kengashi tomonidan sanksiyalardan bo‘yin tovlashni YIda jinoyat deb tan olish to‘g‘risidagi qarorni ma’qullashini kutmoqda. Bu sud qarori bilan aktivlarni musodara qilishni soddalashtiradi.
Reyndersning ta’kidlashicha, agar Yevropa Ittifoqi sanksiyasiga ega shaxslarning muzlatilgan aktivlari jinoiy yo‘l bilan qo‘lga kiritilgan deb e’tirof etilsa va musodara qilinsa, ular Ukraina uchun kompensatsiya jamg‘armasiga o‘tkazilishi mumkin.
Avvalroq Germaniya Rossiyaning 4,8 milliard yevrolik aktivlarini muzlatib qo‘ygani ma’lum bo‘lgan edi.
Izoh (0)