Ўзбекистонда ЯИМ ўсиш суръати пасайиши прогноз қилинмоқда ва инфляция даражасини пасайтириш таклиф этилди. Бу ҳақда Халқаро валюта жамғармаси хабар бермоқда.
Рон ван Руден бошчилигидаги Халқаро Валюта Жамғармаси ходимлари жамоаси 2022 йил 7—15 ноябрь кунлари Ўзбекистон ҳукумати билан иқтисодий ўзгаришлар ва истиқболларни ҳамда сиёсат устуворликларини муҳокама қилиш учун учрашди. Шундан сўнг, жамғарма ўз баёнотини эълон қилди.
Инфляция қанчалик чуқур илдиз отган бўлса, уни назорат остида ушлаб туриш шунчалик қимматга тушади, — дея огоҳлантиради ХВЖ.
Шу сабабли, пул-кредит сиёсати инфляция даражасини пасайтиришга қаратилган бўлиши керак.
Мутахассислар Марказий банкнинг жорий ёндашувининг тўғрилигини таъкидлайди, аммо унинг таъсири чекланган деб ҳисоблайди. Бунга сабаблари эса молиявий воситачилик даражасининг пастлиги, шунингдек, иқтисодиётнинг юқори долларлашувидир.
ХВЖ янада самарали пул-кредит сиёсати учун имтиёзли кредитлаш дастурларини қисқартиришга чақирди. Бунинг ўрнига, муҳим фаолият учун фоизли субсидиялар жорий этиш таклиф этилади.
Фискал сиёсат ҳам паст инфляцияни қўллаб-қувватлаши керак. Шу билан бирга, аҳолининг ижтимоий ҳимояга муҳтож қатламларини манзилли қўллаб-қувватлаши зарур.
Халқаро валюта жамғармаси Ўзбекистонда 2022 йил якунига қадар ЯИМ реал ўсиши 5,8 фоизни ташкил этишини прогноз қилди. 2023 йилда бу кўрсаткич 4,8 фоизни ташкил қилиши кутилмоқда.
Келгуси йилда уни 3 фоизгача камайтириш режалаштирилган, аммо бу ҚҚСнинг камайиши ва олтин нархининг тушиши хавфини ҳисобга олган ҳолда «қийин вазифа» бўлиши мумкин.
Ялпи ички маҳсулот 2022 йилда киши бошига 2 254 долларни, 2023 йилда эса 2 504 долларни ташкил этиши прогноз қилинган.
Мутахассислар имтиёзларни бекор қилиш ва солиққа риоя қилишни яхшилаш орқали солиқ солинадиган базани кенгайтиришни тавсия қилди. Шунингдек, улар давлат инвестицияларини бошқаришни яхшилаш имкониятларини қайд этди.
Изоҳ (0)