Ўтган ҳафта давомида, яъни 7—13 ноябрь кунлари Ўзбекистон республика товар-хом ашё биржасининг барча савдо платформаларида 2,6 трлн сўмлик товарлар сотилган. Бу ҳақда биржа матбуот хизмати хабар бермоқда.
Мазкур кўрсаткич аввалги ҳафтага нисбатан 8,3 фоизга кўпдир. Бунда сотувларнинг:
- 82,9 фоизи — биржа савдолари;
- 1,5 фоизи — кўргазма-ярмарка савдолари;
- 15,4 фоизи — электрон давлат харидлари;
- 0,2 фоизи — авторақамларнинг онлайн-аукционига тўғри келди.
Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 625,8 млрд сўмни ташкил қилди.
Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 80,5 млрд сўмлик маблағлари тежалди.
Кўриб чиқилаётган давр мобайнида онлайн аукцион орқали 2 638 та авторақамлар сотилди. Сотилган давлат рақам белгиларининг умумий суммаси 5,4 млрд сўмни ташкил қилди.
Савдолар натижасида битимларнинг:
- 8,4 фоизи — биринчи тоифадаги авторақамларга;
- 7,2 фоизи — иккинчи;
- 7,1 фоиз — учинчи;
- 10 фоизи — тўртинчи;
- 18,6 фоизи — бешинчи;
- 48,7 фоиз — олтинчи тоифа авторақамларга тегишлидир.
Биржа савдолари
Кўриб чиқилаётган даврда очиқ биржа савдолари орқали жами 2,1 трлн сўмлик товар ресурслари сотилди.
Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйди.
Биржанинг суюлтирилган газ бозорида нархлар пасайиши қайд этилди. Ҳафта давомида биржа савдоларига 5,8 минг тонна суюлтирилган газ қўйилди.
Унинг 5,77 минг тоннаси, яъни 99,3 фоизи сотилди. Ўтказилган савдоларда ҳар куни ўртача 219 харидор иштирок этди.
Ҳафта давомида суюлтирилган газ бўйича шаклланган кунлик ўртача нархлар маҳсулотнинг бир тоннаси учун 3,78 млн сўмдан 3,69 млн сўмгача, яъни 2,2 фоизга пасайган.
Биржанинг шакар бозорида ҳам нархлар пасайиши қайд этилди. Ҳафта давомида биржа савдоларига 10,5 минг тонна шакар қўйилди ва унинг 9,8 минг тоннаси, яъни 93,3 фоиз қисми сотилди. Ўтказилган савдоларда ҳар куни ўртача 293 харидор иштирок этди.
Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 10,74 млн сўмдан 10,56 млн сўмгача пасайган.
Ўтказилган биржа савдолари натижасида маҳаллий шакарнинг Ц-2 – категорияси бўйича шаклланган ўртача ҳафталик нархи маҳсулотни бир тоннаси учун 10,97 млн сўмни ташкил этди.
Ўтган ҳафта мобайнида биржа савдоларида 110,6 минг тонна цемент сотилди. Ўртача кунлик сотув ҳажмлари 22,1 минг тоннани ташкил қилди.
Ушбу маҳсулотнинг бир тоннаси учун нарх 582,0 минг сўмдан 579,0 минг сўмгача пасайди. Ўтказилган савдоларда ҳар куни ўртача 175 харидор иштирок этди.
Изоҳ (0)