Россиянинг Саратов шаҳрида 27 ёшли ўзбекистонлик эркак қўлга олинди. Бу ҳақда «Московский Комсомолец» нашри хабар берди.
Саратов прокуратураси эркак суддан қочиб кетгани учун Ўзбекистонда қидирувда бўлганини маълум қилди. Маҳаллий терговчиларнинг сўзларига кўра, фуқаро 2020 йил гиёҳванд моддалар савдоси билан шуғулланган. Натижада у тўрт йилга озодликни чеклаш жазосига ҳукм қилинган, аммо қочиб кетган.
Айбланувчи Саратовга кетгани тахмин қилинган ва мазкур версия тасдиқланган. Саратов полицияси ходимлари эркакни Озинский туманидаги аҳоли пунктларидан бирида қўлга олган. Прокуратура экстрадиция текширувини бошлаган ва экстрадиция қилиш учун ҳеч қандай тўсиқларни аниқламаган. Ҳозирда эркакни Ўзбекистонга бериш учун ҳужжатлар тайёрланмоқда.
Эслатиб ўтамиз, Россияда террорчилик ташкилотини молиялаштириб келган Ўзбекистон фуқароси 8 йилга қамалганди. У фуқароларни йўллаш ва жангариларни Афғонистон ҳамда Покистонга юбориш билан шуғуллангани боис 2013 йилдан буён Ўзбекистон ҳуқуқ-тартибот идоралари томонидан халқаро қидирувда бўлган. 2021 йилда эркак ФХХ ходимлари томонидан қўлга олинган.
Мавзуга доир: Ўзбекистонда қидирувда бўлган «Ҳизб ут-Таҳрир» етакчиси Қирғизистонда ушланди
Изоҳ (0)