Херсондаги «қийноқ камералари», Россия қўшинларидан қолган техника ва ашёлар. Урушнинг 266-кунидан фоторепортаж
Украина Қуролли кучлари 15 ноябрь кунги оммавий ҳужум чоғида Россия Украина шаҳарларига юзга яқин ракета учирганини маълум қилди. Украина энергетика вазири Герман Галушенко воқеани «уруш бошланганидан бери энергетика секторига берилган энг катта зарба» деб атади. Украина ҳарбийларининг АҚШ ва унинг иттифоқчиларига маълум қилишича, 15 ноябрь куни улар Польшада ракета қулаган жой яқинида Россия ракетасини уриб туширишга уринган. АҚШ якуний хулосалар қандай бўлишидан қатъи назар, Польша ҳудудига ракеталарнинг қулаши учун Россия жавобгар, деб ҳисобламоқда. Россия Ташқи ишлар вазирлиги воқеага алоқадорлигини рад этмоқда. Украина Хавфсизлик хизмати Херсонда рус ҳарбийлари томонидан шаҳарни оккупация қилиш вақтида фойдаланилган «қийноқ камералари» топилганини даъво қилмоқда. «Вагнер» гуруҳи аъзолари камида 40 нафар уруш қатнашчисини судсиз қатл қилган, деб хабар берди «Рус сидяшая» инсон ҳуқуқлари лойиҳаси асосчиси Олга Романова.
Meduza урушнинг 266-кунига оид асосий фотосуратларни тақдим этди.
Чернобаевкада Россия қўшинлари тарк этган позициялар
Россия қўшинлари Херсондан чекинганидан кейин Чернобаевка аэропорти ҳудудида рус армиясидан қолган ҳарбий техника бўлаклари. Чернобаевка — Херсондан 11 километр узоқликда жойлашган қишлоқ. Чернобаевкада аэропорт борлиги сабабли, қишлоқ рус армияси учун стратегик аҳамиятга эга эди. 24 февраль куниёқ Россия аэропортга зарба берди ва уч кундан кейин уни эгаллаб олди. Ўша кундан бери Украина Қуролли кучлари аэропортни мунтазам равишда ўққа тутди: президент офиси раҳбари маслаҳатчиси Алексий Арестовичнинг сўзларига кўра, 10 июлга қадар Украина қўшинлари 26 та ҳужум уюштирган. 11 ноябрь куни Украина Қуролли кучлари Чернобаевкани озод қилди, 14 ноябрда эса қишлоқ Россия томонидан ўққа тутилгани хабар қилинди.Фото: Reuters
Чернобаевка аэродромида рус қўшинларининг ташлаб кетилган ҳарбий техникаси. Украина Қуролли кучлари Чернобаевкадаги рус позицияларига мунтазам ва муваффақиятли ҳужум қилди — шунинг учун ҳатто интернетда бу қишлоқ ҳақида мемлар пайдо бўлди.Фото: Reuters
Аэропорт ҳудудида рус аскарлари томонидан ўғирланган музлатгичлар.Фото: Reuters
Украина ҳарбийлари томонидан аэродромда топилган одам скелети.Фото: Reuters
Россия армиясининг ишлатилган артиллерия снарядлари.Фото: Reuters
Херсондаги гуманитар вазият
11 ноябрь куни озод этилган Херсон аҳолиси шаҳарнинг бош майдонида гуманитар ёрдам тарқатилишини кутмоқда. Херсонда вилоятнинг бутун ўнг қирғоқ қисмига узатиладиган сув таъминоти тизими ва йирик электр станцияси вайрон бўлган, шу боис шаҳарда электр ва сув йўқ, алоқа билан ҳам муаммолар давом этмоқда.Фото: EPA
Херсонликлар озиқ-овқат учун навбатда.Фото: Reuters
Изоҳ (0)