Украинадан Қора денгиз орқали қишлоқ хўжалик маҳсулотлари олиб чиқиб кетилишини таъминловчи дон битими 120 кунга узайтирилади, дея маълум қилди мамлакат президенти Владимир Зеленский ўз Twitter’ида.
«БМТ бош котиби Антониу Гутерриш ва Туркия президенти Ражаб Тоййиб Эрдўғон билан бирга озиқ-овқат инқирозига қарши глобал кураш бўйича бош қарорни қабул қилдик», — деб ёзди у.
Украина инфратузилма вазири Александр Кубраков Twitter’да қўшимча қилишича, Киев битимни бир йилга узайтириш (аввалроқ худди шу таклифни Анқара билдирганди) ва унинг қамровини кенгайтириб, Николаев портини ҳам қўшиш таклифини билдирган. Ҳозирда дон Одесса, Жанубий ва Черноморск портларидан ташилади.
Bloomberg нашри 15 ноябрь куни Москва ҳам, катта эҳтимол билан, дон келишувини узайтириши ҳақида манбаларига таяниб хабар берганди. «РИА Новости» ва «ТАСС» манбалари 17 ноябрь куни маълум қилишича, битимни узайтириш бўйича музокаралар ҳали давом этмоқда. Дон келишувининг амал қилиш муддати 19 ноябрда тугаши керак.
Келишув 2022 йил июлида Истанбулда имзоланганди. Туркия ва БМТ воситачилик қилган, Россия ва Украина бир-бири билан эмас, балки улар билан битим тузган эди.
Ҳужжат иккита қисмдан иборат бўлиб, биринчиси Украина қишлоқ хўжалик маҳсулотларини чиқариб кетиш билан, бошқаси эса Россиянинг шундай маҳсулотлари ҳамда ўғитлари экспортига чекловларни бекор қилиш билан боғлиқ бўлган.
Мавзуга доир:
- Россия дон битими доирасида гуманитар йўлак орқали кемалар ҳаракатини тўхтатди. БМТ эса битим амал қиляпти, деб ҳисоблашда давом этади
- Украина дон битими доирасида кемалар ҳаракатини тўхтатишга рози бўлди. Туркия кемалари маҳсулотларни ташишда давом этади
- Путин Украина билан тузилган «дон битими»ни чеклашни Эрдўғон билан муҳокама қилади
Изоҳ (0)