Украина ички ишлар вазири Денис Монастирский ҳуқуқ-тартибот идоралари Херсон вилояти ҳудудида россиялик ҳарбийлар томонидан ўлдирилган 63 кишининг жасадини топгани ҳақида маълум қилди.
«Ҳозир терговчилар уларни текширмоқда ва қийноққа солиш бўйича барча фактларни аниқламоқда, гувоҳларни топмоқда, ўлганларнинг жасадлари эксгумация қилинмоқда», — деб Монастирскийнинг сўзларидан иқтибос келтирган ИИВ матбуот хизмати.
Вазирнинг сўзларига кўра, ҳозиргача Херсон вилояти ҳудудида содир этилган ҳарбий жиноятлар бўйича 436 та жиноий иш қўзғатилган. Бундан ташқари, ҳуқуқ-тартибот идоралари Россия ҳарбийлари томонидан маҳбуслар сақлаб турилган 11 та қамоқхонани аниқлади — улардан камида тўрттасида қийноқ қўлланган.
Монастирский қидирув эндигина бошланганини, яна кўплаб «зиндонлар ва қабристонлар» топилиши мумкинлигини таъкидлади.
9 ноябрь куни Россия мудофаа вазири Сергей Шойгу урушнинг биринчи кунларида Россия томонидан босиб олинган Херсондан қўшинларни олиб чиқишни буюрди. Икки кундан кейин Украина Қуролли кучлари шаҳарга кирди. 14 ноябрь куни Украина президенти Владимир Зеленский ҳам Херсонга ташриф буюрди. У Херсон вилоятида «Россия армияси мамлакатнинг бошқа минтақаларидаги каби ўзидан ваҳшийликлар қолдирганини» айтди.
Изоҳ (0)