Жо Байденнинг G20 саммитидаги «шпаргалкаси» суратлари тарқалди. Унда қаерда ўтириш, қачон гапириш ва суратга тушиш ҳақида йўл-йўриқлар бор

Мухбирлар АҚШ президенти Жо Байденга G20 саммитида чиқиш қилиш учун йўл-йўриқлар кўрсатилган қоғозлар суратларини эълон қилди, деб ёзади Daily Mail.

Суратлардан бирида глобал инфратузилма ва инвестициялар бўйича янги шерикликни муҳокама қилишга бағишланган учрашувни қандай олиб бориш бўйича тафсилотлар ёзиб берилган.

«Сиз ўртада ўтирасиз, ёнингиздаги столларни президент Видодо (Индонезия президенти) ва Еврокомиссия раҳбари Урсула фон дер Ляйен эгаллайди. Сиз беш дақиқа баёнот берасиз. Баёнот матни кейинги саҳифада», — дейилади йўриқномалардан бирида.

АҚШ президенти учун батафсил келтириб ўтилган кўрсатмаларда қачон суратга тушишдан тортиб, кириш гапларини айтишгача бўлган ҳаракатларнинг барчаси бор.

Байден янглиш нарсаларни гапириб юбориш ва нобоп ҳаракатларни амалга ошириш ҳолатларига тез-тез тушиб туради.

Чунончи, октябрь охирроғида Байден вице-президент Камала Харрисни туғилган куни билан табриклар экан, уни адашиб «президент» деб юборганди.

Яна бир сафар у ўғлининг Ироқда ҳалок бўлганини айтган. Аслида эса Байденнинг катта ўғли 2015 йилда мия шиши туфайли вафот этган.