Польша президенти Анжей Дуда мамлакатга келиб тушган ва икки кишининг ўлимига сабаб бўлган ракета зарбаси Польшани нишонга олмаганини маълум қилди. Бу ҳақда Reuters хабар берди.
Президентнинг сўзларига кўра, Польшанинг шарқига келиб тушган иккита ракета Россия томони учирилгани ҳақида ҳеч қандай далил йўқ. Ракета Украина мудофаа кучлари томонидан қўлланилгани эҳтимоли юқори», дейди Дуда бош вазир билан ўтказган матбуот анжуманида.
Польшанинг Украина билан чегарадош қишлоғига 15 ноябрь куни тасодифан иккита ракета келиб тушди, Бунинг оқибатида икки киши ҳалок бўлди, ҳавога қирувчи самолётлар кўтарилди. Польша бош вазири Матеуш Моравецки шошилинч равишда Вазирлар Кенгашининг Миллий хавфсизлик ва мудофаа қўмитасини чақирди. Йиғилиш ўтказиш сабаблари эса ошкор этилмади.
Ассосиатед Пресс АҚШнинг уч нафар расмийсига таяниб, Польшага тушган ракеталар Украина армиясининг Россия ҳужумини қайтариш учун отган ракеталари бўлиши мумкинлигини маълум қилди. Пентагон матбуот котиби Пет Райдер журналистларга ракеталарнинг кимга тегишли эканини ҳали тасдиқлай олмаслигини айтган. АҚШ президенти Жо Байден ҳам уларнинг Россиядан учирилгани ҳозирча рад этилаётгани ҳақида гапирди. Туркия президенти Польшага тушган ракеталарнинг Россияга алоқаси йўқлигини айтди.
Россия Хавфсизлик кенгаши раиси ўринбосари Дмитрий Медведев Польшага ракета отилиши билан боғлиқ воқеа жаҳон уруши хавфини оширишини таъкидлади.
Изоҳ (0)