Украина хавфсизлик хизмати Чеченистон раҳбари Рамзан Қодировни қидирувга берди. Бу ҳақда «РИА Новости» хабар берди.
Қодиров Украина жиноят кодексига кўра, 10 йилдан 15 йилгача озодликдан маҳрум қилишни назарда тутувчи икки модда, яъни тажовузкор уруш ёки агрессив ҳарбий ҳаракатлар бўйича айбланмоқда.
Август ойида Украина хавфсизлик хизмати Чеченистон раҳбари Рамзан Қодиров ва унинг ёрдамчиларига ҳарбий жиноятларда айблов қўйганди. Украина разведкаси 2022 йил февраль март ойларида Қодиров Миллий гвардия чечен бўлинмаларининг алоҳида ҳарбий амалиётларини ишлаб чиқиш ва режалаштиришни шахсан ўзи назорат қилгани, буйруқлар бергани, уларнинг раҳбарларидан ҳисобот қабул қилганини очиқлаган.
Терговчилар Қодировни тажовузкор урушга тайёргарлик кўриш ва уни бошлаш, Украина чегараларини ўзгартириш бўйича ҳаракатларни амалга ошириш, шунингдек, Россиянинг Украинага қарши ҳарбий тажовузини оқлашда гумон қилмоқда. Мартинов ва Межидов урушга оид қонунларни бузганликда, ҳарбий асирларга ёки тинч аҳолига нисбатан шафқатсиз муносабатда бўлганликда айбланмоқда.
«РИА Новости»га кўра, Чеченистон раҳбари Украина хавфсизлик хизмати томонидан қидирувга берилган биринчи россиялик сиёсатчи эмас. Хусусан Россия ТИВ расмий вакили Мария Захарова Украина ҳудудий яхлитлигига тажовуз қилишда айбланган. Россия Хавфсизлик кенгаши раиси ўринбосари Дмитрий Медведев ва бошқа қатор расмийлар ҳам қидирувга берилган.
Изоҳ (0)