АҚШнинг 45-президенти Дональд Трампнинг қизи, ишбилармон аёл Иванка отасининг янги президентлик сайловолди кампаниясида иштирок этишни режалаштирмаяпти. Бу ҳақда у Fox News Digital ахборот порталига берган интервьюсида айтди.
«Отамни жуда яхши кўраман. Аммо бу сафар мен ёш болаларим ва шахсий, оилавий ҳаётимни биринчи ўринга қўйишга қарор қилдим. Отамни доим қўллаб-қувватлайман, лекин сиёсий майдондан ташқарида», — деди Трампнинг президентлиги даврида унга маслаҳатчи бўлган Иванка.
2016 йилда Трампнинг биринчи сайловолди кампанияси пайтида Иванка отасини қўллаб-қувватловчи тадбирлар ва митингларда тез-тез нутқ сўзлаган, сайловда ғалаба қозонганидан кейин эса АҚШ маъмуриятида кўнгилли маслаҳатчи бўлиб ишлаган. Иванканинг турмуш ўртоғи Жаред Кушнер президент маъмуриятида катта маслаҳатчи бўлган.
Трампнинг куёви ва қизининг давлат бошқарувидаги фаолияти оммавий ахборот воситаларида танқидларга сабаб бўлди. Хусусан, Иванка хавфсизлик бўйича қарорлар муҳокамасида иштирок этгани ва Сурияга зарба бериш тўғрисида қарор қабул қилишда президентга таъсир ўтказгани ҳақида хабарлар бор. 2018 йилда New York Times газетаси Кушнерни бир неча йил давомида даромад солиғи тўламаганликда айблаган.
Трампнинг ўзи 2024 йилги президент сайловига ўз номзодини қўйгани ҳақида эълон қилди. Шунингдек, у агар АҚШ президенти бўлса, сайлов тизимини ислоҳ қилишга ваъда берди.
Изоҳ (0)