Индонезиянинг Бали оролида G20 давлатлари етакчилари 16 ноябрь куни бўлиб ўтган саммитда қўшма баёнот қабул қилиб, Россиянинг Украинага қарши ҳужумини кескин қоралади ва уруш инсониятга азоб-уқубатлар келтираётгани, жаҳон иқтисодиётидаги вазиятни издан чиқараётганини таъкидлади. Бу ҳақда Reuters хабар берди.
G20 аъзолари Россия қўшинларининг Украина ҳудудидан тўлиқ олиб чиқилишини талаб қилмоқда. Етакчилар Украинада давом этаётган уруш озиқ-овқат ва энергетика хавфсизлигига салбий таъсир кўрсатаётганини ва бутун дунёда тартибсизликларни келтириб чиқарганини яна бир бор тасдиқлади. Хитой саммит якунида бетараф қолди. Расмийлар Россияни очиқдан очиқ танқид қилмади, қўллаб-қувватламади ҳам. Саммит якунидаги баёнотда G20 давлатлари дон келишувини амалга ошириш ва қишлоқ хўжалиги маҳсулотларининг очиқ савдоси тарафдори экани келтириб ўтилди.
Туркия ва БМТ воситачилигида Украина портларидан дон ва озиқ-овқат маҳсулотларини хавфсиз ташиш бўйича иккита келишув имзоланганини олқишлаймиз. Қишлоқ хўжалиги савдоси бўйича глобал қоидаларни янгилаш, озиқ-овқат савдосини осонлаштириш ҳамда озиқ-овқат ва ўғит экспортига Жаҳон савдо ташкилотининг тегишли қоидаларига мос келмайдиган тарзда тақиқ ёки чекловлар киритмаслигини тасдиқлаймиз, дейилади баёнотда.G20 давлатлари озиқ-овқат инқирозидан азият чеккан мамлакатларга ёрдам беришга, гуманитар фаолиятни санкциялардан олиб ташлашга чақирди. Баёнотда энергия ташувчиларга бўлган талаб арзон энергия манбаларига мос келиши кераклигини таъкидланди. G20 давлатлари энергия ресурсларидан фойдаланишдаги камчиликларни бартараф этишга ва «энергетика қашшоқлиги»га барҳам беришга интилишини эълон қилди. Улар муқобил энергия манбаларига ўтиш жараёнини тезлаштирмоқчи. Мамлакатлар вакиллари иқлим ўзгаришига қарши курашишини ҳам айтди.
G20 марказий банклари нархлар барқарорлигига эришмоқчи. Ҳужжатда давлат вакиллари коррупцияга мутлақо тоқат қилмасликни эълон қилиши қайд этилди. Мамлакатлар вакиллари ноқонуний миграцияга қарши курашни эълон қилди, жиноий даромадларни легаллаштириш ва терроризмни молиялаштиришга қарши курашни кучайтиришга чақирди.
G20 дезинформацияга қарши курашиш ва кибермакондаги таҳдидларга қарши туриш муҳимлигини таъкидлади. Бундан ташқари ковид вакциналарига универсал киришни таъминлаш айтиб ўтилди. Энг асосий эътибор ядро қуролидан фойдаланишга қарши қаратилди.
«Можароларни тинч йўл билан ҳал қилиш, инқирозни бошқариш, дипломатия ҳамда мулоқот ҳаётий муҳим аҳамиятга эга. Ҳозирги давр уруш даври бўлмаслиги керак», — дейилади баёнтда.
Эслатиб ўтамиз, саммитда Украина президенти Владимир Зеленский онлайн қатнашди ва Украинадаги урушни тугатиш учун 10 шартни санаб ўтди. Чеченистон раҳбари бу шартларни «беъмани» деб баҳолади ва ўзининг шартларини эълон қилди.
Изоҳ (0)