Ўзбекистон элчихонаси ходимлари Япониянинг Kyosan Electric Manufacturing компанияси бош директори ўринбосари Такаюки Таджима билан учрашув ўтказди, деб хабар бермоқда «Дунё» ахборот агентлиги.
Kyosan Electric Manufacturing компанияси 1917 йилда ташкил этилган. Йўлларда ҳаракатни бошқариш ускуналари, шу жумладан, светофорлар, уларни бошқариш тизимларини ишлаб чиқариш ва ўрнатиш, йўллар ва йўл кесишмаларида транспорт оқимларини бошқариш билан шуғулланади. Бундан ташқари, компания темир йўл инфратузилмасини бошқариш учун ускуналар, жумладан, темир йўл линияларини алмаштириш, темир йўл линияларида поездлар ўртасидаги тўқнашувларни олдини олиш тизимлари, электр энергиясини барқарорлаштириш ва узлуксиз таъминлаш, транспорт воситаларини бошқариш тизимларини ишлаб чиқаради.
Учрашувда транспорт соҳасида ҳамкорлик қилиш, йўллар ва чорраҳаларда, айниқса, тиғиз вақтларда тирбандликнинг олдини олиш мақсадида республика шаҳарларида транспорт оқимларини бошқариш масалалари атрофлича муҳокама қилинган.
Ўзбекистон шаҳарларида транспорт воситалари оқими йилдан йилга ортиб, транспорт воситалари ҳайдовчилари учун йўлларда қийинчиликлар туғдираётгани қайд этилди. Тошкент учун хавфсиз шаҳар концепциясини яратиш бўйича режалар ҳам тасдиқланган.
Ўз навбатида, япон компанияси вакиллари Япониядаги йўллар ва чорраҳалардаги транспорт оқимларини бошқариш бўйича ўз тажрибаларини ўртоқлашган. Таъкидланишича, компания тизими ва ускуналари чорраҳалар ҳамда йўлларни инсон аралашувисиз тартибга солиш ва тушириш имконини беради. Бу Япония шаҳарларида самарали қўлланилмоқда ва автотранспорт оқимларини пасайтириш имконини беряпти.
Бундан ташқари, компания вакиллари темир йўл транспортида мавжуд ускуналар ва бошқарув тизимлари, хусусан, поездларни автоматик бошқариш мосламаси (АTC), огоҳлантириш тизими, йўловчилар оқимини бошқариш, поездлар ҳаракатини белгиланган жадвалга мувофиқ созлаш бўйича тажрибалари ҳақидаги маълумотларни ҳам ўртоқлашган. Компанияда пиёдалар ва автотранспорт воситаларини темир йўл кесишмаларидан ўтувчи поездлар тўқнашувидан ҳимоя қилувчи ускуналар ҳам мавжудлиги маълум қилинган.
Музокаралар чоғида Ўзбекистонда автомобиль ва темир йўлларни бошқариш тизимлари ҳамда ускуналарини ишлаб чиқариш, шунингдек, жорий этиш масалалари муҳокама қилинган. Япония томони Ўзбекистонда электр жиҳозлари ишлаб чиқарувчилар билан ҳамкорликда зарур жиҳозлар ишлаб чиқаришни йўлга қўйишга тайёр эканини маълум қилган.
Бундан ташқари, компания вакиллари Ўзбекистон шаҳарлари йўлларида, кейинчалик чорраҳаларда автотранспорт оқимини тушириш тизимларини жорий этиш орқали тадқиқот ишларини олиб бориш истагини ҳам билдирган.
Изоҳ (0)