Украина президенти Владимир Зеленский Херсонга ташриф буюрди. Бу ҳақда гувоҳларга таяниб, Reuters хабар бермоқда.
Украина расмийлари давлат раҳбарининг яқинда Россия босқинидан озод қилинган шаҳарга ташрифи ҳақида ҳозирча маълум қилгани йўқ. Одатда Зеленскийнинг озод қилинган ҳудудларга сафарлари ҳақида олдиндан эълон қилинмайди.
Нашрнинг ёзишича, у ерда Зеленский Украина тинчлик музокараларига тайёрлигини яна бир бор маълум қилган.
«Биз олға интиляпмиз ва тинчликка, бутун мамлакатимиз учун тинчликка тайёрмиз», — деди Зеленский.
Херсонда давом этаётган «барқарорлаштириш чоралари» ва миналарни зарарсизлантириш ишлари туфайли журналистларга шаҳарга кириш ҳозирча тақиқланган. Бир қанча журналистлар, жумладан, CNN ва Sky News ғарбий телеканаллари Херсондан репортаж тайёрлаганидан сўнг, Украина ҳукумати уларни аккредитациядан маҳрум қилди.
Эслатиб ўтамиз, ўтган ҳафта Россия Мудофаа вазирлиги Херсондан чекинаётгани ҳақида хабар берди. 11 ноябрь куни кечқурун Украина ҳарбийлари Херсон шаҳри ва унинг атрофидаги қишлоқларга кира бошлади. Уларни кутиб олиш учун минглаб аҳоли Украина байроқлари билан кўчага чиқди.
Изоҳ (0)