АҚШ Киевга Москвага нисбатан «ҳақиқатга яқинроқ талаблар» ҳақида ўйлаб кўришни маслаҳат берган — WSJ

АҚШ президентининг миллий хавфсизлик бўйича маслаҳатчиси Жейк Салливан Украина етакчиси Владимир Зеленскийнинг жамоасига Москва билан музокаралар учун «ҳақиқатга яқин талаблар ва бирламчи вазифалар» ҳақида ўйлаб кўришни, шу жумладан, Киевнинг Қримни қайтариб олиш мақсадини қайта кўриб чиқишни тавсия қилган. Бу ҳақда The Wall Street Journal икки нафар европалик дипломатга таяниб ёзмоқда.

Вашингтон, нашр қайд этишича, Киевга низони музокаралар йўли билан ҳал қилиш учун ҳеч бўлмаганда очиқ бўлиб кўриниши кераклигини билдирган. Салливан бу ҳақда Зеленский ва унинг ўринбосарларига 4 ноябрь куни Киевга ташрифи чоғида айтиб ўтган. Агар Киев музокараларга очиқлигини намойиш этса, унда таъсир ўтказиш учун дастаклар пайдо бўлади, деб ҳисоблайди нашр суҳбатдошлари.

WSJ ёзишича, Жо Байден маъмурияти вакиллари, шу жумладан, Салливан Вашингтон Киевга босим ўтказмоқчи эмаслиги ва музокараларга мажбурламаслиги ҳақида жамоатчиликка жар солишда давом этмоқда. Бу АҚШнинг НАТО бўйича иттифоқдошларини таажжубга солиб қўймоқда. Салливан аниқлик киритишича, АҚШнинг вазифаси — «Украинани жанг майдонидаги қулай позицияга жойлаштиришдан иборат, токи дипломатия учун имконият юзага келган тақдирда, улар музокаралар столи атрофида энг яхши позицияни эгалласин».

Европанинг баъзи мамлакатлари, айниқса, шарқий ва шимолий давлатлари мансабдорлари фикрича, омма олдида музокараларга ундаш Украинанинг саъй-ҳаракатларига путур етказиши ва «альянсни парчалашга интилаётган Россия учун қўл келиши» мумкин. Айни вақтда, Европа ва америкалик манбалар сўзларига кўра, улар Кремль жиддий музокараларга қизиқиш билдираётганини кўрмаяпти.

Аввалроқ АҚШда мансабдор шахслар орасида Россия билан ярашув битимини тузиши учун Украинага босим ўтказиш масаласида зиддиятлар мавжудлиги ҳақида The New York Times хабар берганди.

Аввалроқ Украина президенти Владимир Зеленский ўзи учун Россия билан ярашув музокаралари имкониятини истисно қилмаётганини билдирганди. У 8 ноябрь куни Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.

Кейинроқ Зеленскийнинг Россия билан музокаралар учун шартлари ҳақидаги баёноти АҚШнинг «енгилгина турткиси» билан боғлиқ бўлгани ҳақида хабар берилди.

Ноябрь бошроғида Американинг The Washington Post газетаси АҚШ президенти маъмурияти Украина ҳукуматига мурожаат қилиб, Украинани қўллаб-қувватлаётган мамлакатлар аҳолисини хавотирга солмаслик учун Киев Москва билан музокараларга тайёрлигини оммага намойиш қилишни сўрагани ҳақида хабар берганди.