Украинада бир неча хорижий матбуот журналистлари жанговар зонада ишлаш қоидаларини бузгани учун аккредитация (муайян ҳудудда ишлаш учун рухсатнома)дан маҳрум бўлди, деб хабар бермоқда Украина Қуролли кучлари Бош штаби.
Сўнгги пайтларда айрим оммавий ахборот воситалари вакиллари мавжуд тақиқ ва огоҳлантиришларга эътибор бермай, тегишли ҳарбий қисмлар командирлари ва жамоатчилик билан алоқалар хизматларининг розилигисиз ва Херсон шаҳрида барқарорликни таъминлаш бўйича чора-тадбирлар тугалланмай туриб у ерда ахборот фаолиятини олиб борди. Бундай ҳаракатлар Украина Қуролли кучлари Бош қўмондони 03.03.2022 йилдаги 73-сон буйруғи талабларини, шунингдек, ҳарбий қўмондонликнинг тегишли буйруқларини қўпол равишда бузиш ҳисобланади, — дейилади штаб хабарида.Бош штаб айнан қайси журналистларнинг ишлаш рухсатномалари бекор қилинганига аниқлик киритмади.
«Детектор медиа» нашри манбаларига кўра, камида олти нафар журналист, жумладан CNN ва Sky News ходимлари аккредитациядан маҳрум қилинган. Улардан ташқари, Херсонда «Суспилне» ва Ҳромадске тасвирчи гуруҳлари ишлаган. Бундан ташқари, Рада канали Херсондан трансляция намойиш этган.
«УНИНАН» Telegram-каналида Sky News журналистининг Херсондан олган репортажи чоп этилди.
11 ноябрь куни эрталаб Россия Мудофаа вазирлиги Херсондан чекиниш ҳақида хабар берди. Ўша куни кечқурун Украина ҳарбийлари Херсон шаҳри ва унинг атрофидаги қишлоқларга кира бошлади. Уларни кутиб олиш учун минглаб аҳоли Украина байроқлари билан кўчага чиқди.
Украина президенти Владимир Зеленский яқин орада шаҳарда «барқарорлаштириш чоралари» ва миналардан тозалаш ишлари бошланишини, шунинг учун ҳозирча ОАВ вакиллари Херсонга киритилмаслигини айтди.
Изоҳ (0)