Эрон суди Теҳрондаги намойишлар билан боғлиқ ишлар бўйича ҳукмлар чиқарди, айбланувчилардан бири ўлим жазосига ҳукм қилинди, деб хабар беради Эроннинг Мизан агентлиги.
Қайд этилишича, ҳукмлар дастлабки бўлиб, улар устидан шикоят аризаси берилиши мумкин. Ўлим жазосига ҳукм қилинган шахс ҳукумат биноларига ўт қўйиш, жамоат тартибини бузиш, қотиллик ва миллий хавфсизликка қарши жиноятларни содир этиш мақсадида тил бириктириш, шунингдек, ўқотар қуролдан фойдаланишда айбланмоқда.
Агентлик маълумотларига кўра, айбланувчининг исми Саман Сайдий бўлиб, у тўппончани деразадан отиб юборган, судда эса қурол унга тегишли бўлмаганини айтган. Яна бир судланувчи Муҳаммад Гобадлу қотилликда айбланмоқда. У машинада бир нечта полициячини босиб кетган, улардан бири ҳалок бўлган, беш киши жабрланган. Гобадлу ҳукмга рози бўлган.
Суд жами беш нафар судланувчининг ишлари бўйича қарорлар чиқарган, баъзиларни беш йилдан ўн йилгача муддатга қамоққа ҳукм қилган.
Аввалроқ Эронда 14 минг нафар намойишчи қатл этилиши мумкинлиги, қўлга олинган намойишчиларни қатл қилишга рухсат берувчи резолюция кўпчилик овоз билан қўллаб-қувватлангани хабар берилганди. 290 депутатнинг 227 нафари намойиш иштирокчиларига «қаттиққўллик билан сабоқ бериб қўйиш»ни ёқлаб овоз берган. Резолюция қўлга олинган намойишчиларни қатл қилишга рухсат беради.
Эрондаги намойишларга нима сабаб бўлди?
Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган.Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда.
Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаганди.
Изоҳ (0)