Ўзбекистонда январь—сентябрь ойларида аҳоли томонидан банклардан 6,48 млрд доллар миқдорида хорижий валюта сотиб олинган. Бу ҳақда «Дарё»га Марказий банк ҳисоботидан маълум бўлди.
Жорий йилнинг тўққиз ойида банклар томонидан аҳолига сотилган чет эл валютаси миқдори ўтган йилнинг мос даврига нисбатан 1,8 млрд долларга кўп бўлди.
Бу даврда энг кўп 10 000—50 000 долларлик операциялар амалга оширилган. Уларнинг миқдори 1,29 млрд долларни ташкил қилган. Кейин ўринларни мос равишда 5 000—10 000 ва 1 000—3 000 долларлик операциялар қайд этилган.
Амалга оширилган умумий операциялар сони эса 10,6 миллионтадан ошган.
Валюталар кесимида Ўзбекистон аҳолиси томонидан энг кўп доллар сотиб олинган — 6,38 млрд доллар. Бу борада иккинчи ўринни 3,45 млрд рубль билан Россия валютаси эгаллаган.
Бундан ташқари банклар ўзбекистонликларга 199,6 млн тенге, 39,5 млн евро, 4,7 млн иена, 1,9 млн фунт стерлинг ва 1,4 млн турк лираси сотган.
Аввалроқ Россиядан Ўзбекистонга пул оқими икки баробарга кўпайгани маълум қилинган эди.
Изоҳ (0)