Еврокомиссия раҳбари Урсула фон дер Лаен Европа Иттифоқи Россия нефти нархининг юқори чегарасини белгилашни бошлашга тайёрлигини айтди. Унинг қайд этишича, Европа Иттифоқида зарур воситалар аллақачон яратилган. Бу ҳақда «Коммерсантъ» хабар бермоқда.
Биз Европа Иттифоқида барча керакли воситаларни тайёрладик. Бу орқали нафақат Россиянинг ҳарбий ғазнаси қуриб битиши, балки кўплаб заиф мамлакатлар мақбул нархларга эга бўлиши ҳам муҳим, — деди Урсула фон дер Леен.
Ноябрь ойида G7 мамлакатлари (АҚШ, Буюк Британия, Германия, Франция, Италия, Канада ва Япония) ташқи ишлар вазирлари Россиядан нефть нархининг юқори чегарасини жорий этиш тартиби тез орада якунланишини маълум қилган эди.
Якуний нарх чегараси ҳали белгиланмаган. Бироқ у бир баррель учун 60 доллар атрофида белгиланиши кутилмоқда.
5 декабрь куни Россиянинг Европа Иттифоқига нефть етказиб беришга қисман эмбаргоси ҳам кучга кириши керак. Россия расмийлари, агар бундай қарор жорий этилса, мамлакат нефть етказиб беришни тўхтатишини билдирган.
Аввалроқ ОПЕК Россияда нефть қазиб олишнинг қисқаришини прогноз қилаётгани ҳақида хабар берилганди.
Изоҳ (0)