Иқлим ўзгаришининг салбий оқибатларига муваффақиятли қарши туриш учун жаҳон ҳамжамиятига 1 триллион доллар керак бўлади. Бу ҳақда БМТнинг 2030 йилгача барқарор ривожланиш кун тартибини молиялаштириш бўйича махсус вакили Муҳаммад Муҳйиддинга таяниб «ТАСС» хабар бермоқда.
Иқлим ўзгариши соҳасидаги сўнгги тадқиқотларга кўра, унинг оқибатларини енгиш учун дунёга 1 триллион доллар керак бўлади, — дейди Муҳаммад Муҳйиддин.
Унинг қўшимча қилишича, бу мақсадлар учун илгари таклиф қилинган 100 миллиард доллар, биринчи навбатда, ривожланаётган мамлакатлар эҳтиёжларининг атиги 10 фоизини ташкил этади.
Муҳйиддин, шунингдек, таълим курслари зарурлигини таъкидлади. Унинг сўзларига кўра, ер юзи аҳолисининг ярмидан кўпи иқлим ўзгариши хавфини умуман сезмайди.
6 ноябрь куни Шарм аш-Шайхда БМТнинг иқлим бўйича конференцияси бошланди. 18 ноябргача давом этадиган форум давомида COP-27 кун тартибига оид юзлаб тадбирлар ўтказилади.
Миср шаҳри расмий ва халқаро ташкилотлар делегациялари таркибига кирувчи 62 мингдан ортиқ иштирокчиларни қабул қилади. COP-27 ни 3000 дан ортиқ журналист ёритади.
Аввалроқ 2022 йил Европада сўнгги 30 йилдаги энг иссиқ ёз кузатилгани ҳақида хабар берилган эди.
Изоҳ (0)