Индонезия ҳукумати вакиллари, шу жумладан, республика президенти Жоко Видодо, G20 саммити чоғида Ғарб мамлакатлари етакчиларини Россияга нисбатан муносабатларини юмшатишга чақирди, деб ёзади Politico ўз манбаларига таяниб.
«Америка, Европа, Австралия, Канада ва Япония расмий шахсларига президент Жоко Видодогача бўлган индонезиялик ҳамкасблари томонидан босим ўтказилиб, улардан ‘мослашувчанликъни намойиш қилиш ва Россияга нисбатан унчалик қатъий бўлмаган гапларни қўллаш имкониятини кўриб чиқиш сўралди», — дейилади хабарда.
Нашр манбалари маълумотларига кўра, Видодо якуний баёнот қабул қилинса, буни «ўзининг шахсий муваффақияти» деб ҳисоблайди — Индонезия президенти ташкилотнинг бутун тарихи давомидаги энг мураккаб саммитда раислик қилишига тўғри келаётганини бир неча марта таъкидлаган.
Шунингдек, Индонезия президенти G20 ни Г19 сифатида қайта ташкил қилиш (2014 йилда Г8 G7 га айлантирилгани каби — Қрим Россия таркибига қўшилганидан кейин, у халқаро клубдан чиқариб юборилган эди) истиқболларидан қочишга ҳам уринмоқда, деб ёзади Politico.
Россия Украинада махсус операция бошлаганидан кейин Ғарб мамлакатлари унга санкциявий босимни кучайтирди. Россия санкцияларни ноқонуний деб ҳисоблайди. Айни вақтда Москва Киев билан сулҳ ҳақидаги музокараларга тайёрлигини бир неча бор таъкидлаган.
Украина президенти Владимир Зеленский Киев «ҳақиқатда ярашувга тайёр бўладиган» Россия билан гаплашишини айтган. Мулоқотни қайта бошлаш учун у ҳудудий яхлитликнинг тикланиши, зарарнинг қопланиши ва «буларнинг барчаси бошқа такрорланмаслигининг кафолатланиши» шартларини илгари сурган.
АҚШ молия вазири Жанет Еллен Россия ва Украина сулҳга эришган тақдирда, санкцияларга тузатишлар киритилиши мумкинлигини, аммо «содир бўлган нарсаларни ҳисобга олиб», бир қатор чекловлар сақланиб қолиши мумкинлигини айтганди.
Изоҳ (0)